संक्रमणकालीन न्यायसम्बन्धी दुई आयोगहरु; सत्यनिरूपण तथा मेलमिलाप आयोग र बेपत्ता पारिएका व्यक्तिको छानबिन आयोगको पदाधिकारी र सदस्यका लागि ३४ जना छानिएका छन्।
निवेदन दिएका १११ जनाबाट सिफारिस समितिले ३४ जनाको नाम सर्टलिस्टमा राखेर उजुरी आह्वान गरेको छ।
अध्यक्षका लागि अग्नी प्रसाद थपलिया, अच्युतप्रसाद भण्डारी, डिल्लीराज आचार्य, महेश थापा, लीलादेवी गड्तौला, विजयसिंह सिजापति र शेरबहादुर केसी सर्टलिस्टमा परेका छन्।
अध्यक्षका लागि ३० जना भन्दा बढीले आवेदन दिएका थिए।
दुई आयोग अध्यक्षसहित ५ सदस्यीय रहनेछ। सदस्यका लागि आवेदन परेकोबाट समितिले २७ जनाको नाम छानेको छ।
सूचीमा रहेका ३४ जनाविरूद्ध कुनै उजुरी भए वैशाख २० गतेसम्म समितिको कार्यालयमा आइपुग्नेगरी लिखित वा अनलाइनबाट प्रमाणसहित दिनका लागि समितिले आह्वान गरेको छ।
समितिले सर्टलिस्टमा परेका ३४ जनालाई प्रस्तुतीकरण दिने समय पनि तोकेको छ।
सूचीको १ देखि ६ नम्बर क्रमसंख्यासम्म भएकाहरुले वैशाख २४ गते बिहान ११ बजेदेखि दिउँसो १ बजेसम्म, ७ देखि ११ सम्म सोही दिन दिउँसो २ बजेदेखि ३:४० बजेसम्म, क्रमसंख्या १२ देखि १७ सम्म परेकाले २५ गते बिहान ११ देखि १ बजेसम्म र १८ देखि २३ नम्बरसम्म रहेकाले दिउँसो २ बजेदेखि ४ बजेसम्म प्रस्तुतीकरण दिने तय गरिएको छ।
त्यस्तै क्रमसंख्या २४ देखि २८ सम्म रहेकाहरूले वैशाख २६ गते बिहान ११ बजेदेखि दिउँसो १ बजेसम्म र क्रमसंख्या २९ देखि ३४ सम्म परेकाहरूले दिउँसो २ बजेदेखि ४ बजेसम्म प्रस्तुतीकरण दिनेछन्।
उजुरी र प्रस्तुतीकरणको मूल्यांकनपछि समितिले पदाधिकारी र सदस्यहरूका लागि सरकारलाई सिफारिस गर्छ।
चैत ११ गते बसेको मन्त्रिपरिषद् बैठकले पूर्वप्रधानन्यायाधीश ओमप्रकाश मिश्रको संयोजकत्वमा दुई आयोगको पदाधिकारी सिफारिस समिति गठन गरेको थियो।
त्यसअघि पूर्वप्रधानन्यायाधीश मिश्रकै संयोजकत्वमा गठन भएको समितिले २ महिनामा पदाधिकारी र सदस्य सिफारिस गर्न नसकी भंग भएको थियो।
अहिलेको समितिलाई पनि दुई महिनाको समय दिएर अध्यक्ष र सदस्य सिफारिस गर्ने कार्यादेश दिइएको छ।
