नेकपा एकीकृत समाजवादीले शिक्षक आन्दोलनमा ऐक्यबद्धता जनाउन प्रदर्शन स्थलमै जाने भएको छ।
शिक्षक आन्दोलनको समर्थनमा ऐक्यबद्धता जनाउन सोमबार अध्यक्ष माधव नेपालको नेतृत्वमा पार्टी नेता-कार्यकर्ताहरू बिजुलीबजार जाने भएको उपाध्यक्ष जगन्नाथ खतिवडाले जानकारी दिए।
थाहा पाउने जति सबैलाई आउन आग्रह गर्दै उनले भनेका छन्, '२६ दिनदेखि चलिरहेको शिक्षक आन्दोलनको समर्थनमा ऐक्यबद्धता जनाउन र सरकारले गरेको हेलचेक्र्याइँ, अपमान र दमनको विरोधमा भोलि वैशाख १५ गते दिउँसो साढे १२ बजे हामी अध्यक्ष कमरेड माधव नेपालको नेतृत्वमा बिजुलीबजार जानेछौं।'
उनले शिक्षकहरूका माग पूरा गर्न पनि आग्रह गरेका छन्।
आइतबार शिक्षकहरूको आन्दोलनमा शिक्षकहरू र प्रहरीबीच झडप भएको थियो। झडप भएपछि प्रहरीले पानीको फोहोरा प्रहार गरिएको थियो। जसमा एक जना पत्रकारसहित २३ जना घाइते भएको प्रहरीले जनाएको छ।
तीन जना सुरक्षाकर्मी र केही शिक्षक घाइते भएका छन्।
