प्रतिपक्षी दल राष्ट्रिय प्रजातन्त्र पार्टीका संसदीय दल नेता राजेन्द्र लिङ्देनले चैत १५ गते तीनकुनेमा भएको घटनालाई हिंसात्मक प्रदर्शन भनेर गलत भाष्य निर्माण गर्न खोजिएको बताएका छन्।
शुक्रबार प्रतिनिधि सभा बैठकमा बोल्दै लिङदेनले हतियारसहित प्रदर्शन भए हिंसात्मक प्रदर्शन भन्न उचित हुने तर तीनकुनेमा त्यसरी हतियार नै बोकेर प्रदर्शन नभए पनि हिंसात्मक भनिएकोमा असन्तुष्टि व्यक्त गरेका हुन्।
'प्रदर्शनकारीहरूसँग बन्दुक हुनपर्थ्यो, खुकुरी हुन पर्थ्यो। उनीहरूसँग लाठी हुनपर्थ्यो, ढुंगा हुनुपर्थ्यो। तपाईंहरूले के पक्रनुभयो? अनुसन्धानका क्रममा त्यस्ता केही चिज फेला परे?,' उनले प्रश्न गरे।
लिङ्देनले त्यस दिन ७४६ राउन्ड अश्रु ग्यास, विभिन्न तहका २५० राउन्डभन्दा बढी गोली प्रहार भएको दाबी गरे।
'त्यो दुर्गा प्रसाईं, रवीन्द्र मिश्र र धवलशमशेरहरूले चलाए? प्रदर्शनकारीहरूले कति चलाए?,' उनले प्रश्न गरे, 'प्रदर्शनसँग साइनो नै नभएका रेबिका क्षेत्री र उनका दाजुलाई कसरी गोली हानियो? घर फर्कँदै गरेका सविन महर्जनलाई कसले मार्यो?'
लिङ्देनले प्रजातन्त्रको पक्षमा सरकार छ भने रवीन्द्र मिश्र लगायतलाई छाड्नुपर्ने बताए।
'प्रजातन्त्रको पक्षमा हुनुहुन्छ। न्यायको पक्षमा हुनुहुन्छ भेन रवीन्द्र मिश्र लगायतका मानिसहरूलाई छाड्नुहोस् र न्यायिक आयोग गठन गरेर सत्यतथ्य बाहिर ल्याउनुस्,' उनले भने।
-1746009348.jpg)
