सञ्चार तथा सूचना प्रविधिमन्त्री पृथ्वीसुब्बा गुरूङले नेपाल विद्युत प्राधिकरणको कार्यकारी निर्देशक कुलमान घिसिङलाई पदबाट हटाउने समाचार मन्त्रिपरिषद्को निर्णय हुनुभन्दा पहिले सञ्चार माध्यममा आएको बताएका छन्।
शुक्रबार काठमाडौंमा राष्ट्रिय सूचना आयोगद्वारा आयोजित सूचनाको हकसम्बन्धी विभागस्तरीय अन्तर्क्रिया कार्यक्रममा बोल्दै उनले यस्तो बताएका हुन्।
उनले मन्त्रिपरिषद्को बैठक सकिनुभन्दा १८ मिनेट अगाडि नै कुलमानलाई पदबाट हटाएको समाचार अनलाइन माध्यममा प्रकाशित भइसकेको बताए।
उनले उक्त विषयमा प्रधानमन्त्री केपी शर्मा ओलीसँग पनि कुरा गरेको बताए।
उनले अनलाइनको समाचारदाता मन्त्री हो? प्रवक्ताले नभन्दै कसले भन्यो? र यसलाई कारबाहीको विषयमा प्रधानमन्त्रीसँग कुरा राखेको जिकिर गरे।
उनले मन्त्रिपरिषद्को बैठकमा मोबाइल बाहिर राखेर आउन मन्त्रीहरूलाई आग्रह गरेको समेत गरे।
उनले मन्त्रिपरिषद्को बैठकपछि कुलमान घिसिङलाई हटाएकोसम्बन्धी सञ्चार माध्यममा गरेको कुराकानी भाइरल बनेको बताउँदै आफूले प्रश्न मात्रैको व्यङ्ग्य गरेको बताए।
मन्त्री गुरूङले सञ्चार माध्यममा सूचना पुर्याउने मन्त्रीलाई आफूले चिनेको समेत धारणा राखे।
उनले भने, 'क्याबिनेटको बैठक चलिरहेको छ, कुलमान जीलाई हटाउने निर्णय गरेको बैठक सकिनुभन्दा १८ मिनेट अगाडि नै आइसक्यो अनलाइनहरूमा। त्यहाँ मन्त्रीहरू र मुख्यसचिव बाहेक अरू कोही छैन। कसले भन्यो त त्यो? मैले प्रधानमन्त्री ज्यूलाई प्रश्न गरे, कसले भन्यो? कि तपाईंले भन्नुभयो कि? कि तपाईंका माननीय मन्त्रीज्यूहरूले भन्नुभयो कि? कि मुख्यसचिवले भन्नुभयो? कसैले त भन्यो? प्रवक्ता तल गएर माइकको अगाडि अभिनुभन्दा अगाडि नै समाचारमा आइसक्यो, अनलाइनमा आइसक्यो। को छ यहाँ मन्त्री अनलाइनको समाचारदाता भन्नुपर्यो? हैन भने, प्रवक्ताले नभनी किन भनेको? अब यो क्याबिनेटमा मोबाइल लिएर आउन बन्द गर्नुपर्यो। कारबाहीको विषय बनाउनुपर्यो।’
उनले अगाडि भने, ‘अब क्याबिनेटको बैठकमा आउँदाखेरी मोबाइल बाहिर राखेर आउने। प्रवक्ताले बाहेक कसैले नभन्ने। यसरी भगवान् भरोसा चलेको मुलुक के। त्यसको व्यवस्थापन त हामी आफैले गर्नुपर्छ। त्यो दिन अरू दुई वटा विषय थियो, आउन पाएको छैन गाडीबाट झर्ने बित्तिकै मन्त्रीज्यू कुलमान घिसिङलाई हटाएको हो? कसरी थाहा पाउनुभयो तपाईंहरूले कुलमानले भनेको हो भने मैले। यो कुरा यति भाइरल भयो कि तपाईंले यसको नभन्नुपथ्र्यो। मैले त उसले पहिले नै सूचना थाहा पाइसकेको भनेर प्रश्न व्यङ्ग्य गरेको मात्रै। अहिले मलाई थाहा पनि छ, त्यो मन्त्री को रहेछ भन्ने।’
मन्त्री गुरूङले सरकारले गरेको निर्णयहरू कुनै बेला फिर्ता लिनुपर्ने हुनाले २४ घण्टापछि मात्रै मन्त्रिपरिषद्का निर्णयहरू सार्वजनिक गर्ने निर्णय गरिएको स्पष्ट पारे।
उनले आफू निजी विचार राख्न प्रवक्ता नभएको बताए।– न्युज एजेन्सी नेपाल
-1746009348.jpg)
