नेपाली कांग्रेसका सभापति शेरबहादुर देउवाले राष्ट्रिय स्वतन्त्र पार्टीका सभापति रवि लामिछानेले सहकारीको रकम अपचलन गरेको पुष्टि भएको बताएका छन्।
बुधबार पार्टी केन्द्रीय कार्यालय सानेपामा सय दिने विशेष अभियानको शुभारम्भ गर्दै देउवाले सहकारीसम्बन्धी गठन भएको संसदीय छानबिन विशेष समितिले लामिछानेमाथि संसदमा उठेका प्रश्नहरू प्रमाणित गरेको बताए।
देउवाले लामिछानेमाथि लागेको ठगीको आरोपबारे विश्वास नलागेको भएपनि समितिले प्रमाणित गरेको र पार्टीका महामन्त्री गगन थापाले उठान गरेको विषय सही भएको बताएका थिए। यसका लागि उनले थापालाई धन्यवादसमेत दिएका थिए।
उनले लामिछाने चलाख मान्छे भएको र आफू छक्क परेको बताए।
‘सहकारीसम्बन्धी कुरा हाम्रो महामन्त्री थापाले धेरै अध्ययन गरेर भन्नुभएको छ। उहाँलाई धन्यवाद दिन चाहन्छु, मैले पत्याएकै थिइनँ, यस्तो छ भनेर। सहकारीको विषय। मैले वास्तवमा पत्याएकै थिइनँ, यस्तो छ भनेर,’ देउवाले भने, ‘रवि लामिछानेजी त कस्तो मान्छे हुनु हुँदो रहेछ भने, चलाख मान्छे। म त छक्कै परेँ कुरा सुनेर। तपाईंले जित्दिनुभयो, त्यसकारण धन्यवाद तपाईंलाई।’
यस्तै उनले अब पार्टी संगठन विस्तार गर्नेतर्फ ध्यान दिन र मिलाउनतिर लाग्न पनि निर्देशन दिए।
-न्युज एजेन्सी नेपाल
