जनता समाजवादी पार्टी नेपालबाट अलगिएका अशोककुमार राईले अध्यक्ष उपेन्द्र यादवको कार्यशैलीकै कारण पार्टी विभाजनमा पुगेको प्रतिक्रिया दिएका छन्।
निर्वाचन आयोग पुगेर आइतबार नयाँ पार्टी दर्ताका लागि निवेदन दिएका राईले पत्रकारहरूसँग कुराकानी गर्दै अध्यक्ष यादवकै कार्यशैलीले पार्टी विभाजन भएको बताए।
विभाजन भई नयाँ पार्टी जसपा गठनका लागि आयोगमा राईसहितले निवेदन दिएका छन्। राई प्रस्तावित केन्द्रीय समितिका अध्यक्ष छन्।
‘यो पार्टी विभाजन हो, संघीय संसदका संसदीय दलका सांसदहरूले पार्टी विभाजन गरेको हो,’ राईले भने, ‘यस्तो निर्णय लिनुपर्ने आवश्यकता पर्यो। किनभने पार्टी महाधिवेशनको संघारमा थियो, स्वच्छ र निष्पक्ष ढंगले महाधिवेशन हुने देखिएन।’
एकताको महाधिवेशन भने पनि अध्यक्ष यादव पक्षले हतार र विधानविपरीत काम गरेको उनको आरोप छ।
‘हामी अलग भएर नयाँ ढंगले पार्टीलाई अघि लैजान लागेका हौं,’ उनले भने, ‘उपेन्द्रजीको कार्यशैलीसँग असहमतिले यो परिस्थिति उत्पन्न भयो।’
उनले आफूहरू अस्थिरताको कारक नबन्ने पनि बताएका छन्।
उनले अहिलेको सत्ता समीकरण फेरबदल हुन खोजेकोले पार्टी फुटेको भन्ने कुरा अहिले प्रष्ट रूपमा देखा नपरेको पनि बताए।
‘अस्थिरताका संकेत भने अभिव्यक्तिमा देखा परेका थिए, त्यस्तो पनि हुन सक्थ्यो कि भन्ने अनुमान हो,’ उनले भने, ‘यो सरकारलाई समर्थन निरन्तर रहन्छ।’
उनले कानूनी सल्लाह गरेर नै नयाँ दल दर्ता गर्न आयोगमा आएको बताए।
२०७८ मा जारी अध्यादेश र त्यसलाई कार्यान्वयन गर्न बनेको नियमावलीअनुसार नयाँ दल दर्ताका लागि निवेदन दिएको उनको भनाइ छ। ‘कानूनी रिक्तता भएको बेला आयोगकै निर्णय अन्तिम हुन्छ,’ उनले भने।
उनले जसपा नेपालको ठाउँमा नयाँ दलको नाम जसपा मात्रै राख्न प्रस्ताव गरिएको बताए।
यो पनि: हाम्रो पार्टी फुटेको होइन, केही साथीहरू बाहिरिएका हुन्: जसपा नेपालका प्रवक्ता सुमन
