नेपाली कांग्रेसका नेता अर्जुननरसिंह केसीले जनमत वाम गठबन्धनलाई भएकाले उनीहरूकै नेतृत्वको सरकार बन्नु पर्ने बताएका छन्।
चितवनमा आज आयोजित पत्रकार सम्मेलनमा उनले वाम गठबन्धनको सरकार बन्न कांग्रेस बाधक नबन्ने बताए।
उनले भने, ‘अहिलेको जन अभिमत वाम गठबन्धनलाई भएकाले वाम गठबन्धनकै सरकार बन्छ।’
अर्को एक प्रसंगमा उनले कांग्रेसको नेतृत्वमा प्रशस्त कमजोरी रहेको बताए। नेता केसीले नीतिगत रूपमा धेरै सुधार गर्नु पर्ने, नेतृत्वमा कमजोरी रहेको र संरचनामा अपारदर्शी भएकाले पार्टी कमजोर बनेको बताए।
उनले भने, ‘हाम्रा नीति निर्णयका कुरा पार्टीभित्र यति ठूलो विभाजन र गुटबन्दी छ, त्यो गुटभित्र पनि गुटले सञ्चालन नगरेर पार्टी एउटा गिरोहले सञ्चालन गरेको छ।’
रासस
