भारतीय साहित्य जगतमा निकै सम्मानका साथ लिइने नाम बंगाली साहित्यकार रवीन्द्रनाथ टैगोर लिखित नाटक ‘मालिनीः द प्रिन्सेस अफ गार्डेन’ को नेपाली संस्करण अब युरोप पुग्ने भएको छ।
यसअघि एक वर्षपहिले थिएटर भिलेजमा लामो समय नियमित मञ्चन गरिएको नाटकले भारतको बिभिन्न सहरमा आयोजित नाटक महोत्सवमा भाग लिइसकेको छ। थिएटर भिलेजका ड्रामाटर्ग जिवेश रायमाझीको अनुवादमा विमल सुवेदी निर्देशित नाटकले युरोपका जर्मनी र बेल्जियमका बिभिन्न सहरमा २१ दिनभित्र आफूलाई प्रस्तुत गर्नेछ। राजेन्द्र श्रेष्ठ, सुजन ओली, नवराज पराजुली, जेनी सुनुवार, दीपेश राई अभिनित नाटकले युरोपका सौखिन नाट्यसंस्थाहरुको छाता संगठनको निम्तो पाएको हो। नाटकमा कलाकारहरु फेरिँदै गएका हुन्।
२१ दिने दौरानमा यी कलाकारले नाटक मञ्चन गर्नुका साथै नाटकसम्बन्धि बिभिन्न कार्यशालमा लिनेछन् भने भारतको प्रख्यात नाट्यसंस्था ‘नेसनल स्कुल अफ ड्रामा’ ‘पासआउट’ तथा नाटकका निर्देशक विमल सुवेदीले कार्यशालाका प्रशिक्षार्थीहरुलाई प्रशिक्षण दिनेछन्।
सन् २०१४ मा पाकिस्तानको ‘नेसनल एकेडेमी अफ पर्फमेन्स आर्ट’आयोजित संगीत तथा नाट्य महोत्सवमा पहिलोपटक मञ्चन भएको नाटकको युरोप यात्रासँगै युरोपेलीहरुलाई नेपाली नाटकको वर्तमान चित्र पनि देखाउन लागिएको निर्देशक सुवेदीले बताए। ‘युरोपेली देशहरुलाई नेपाली नाटकको आफ्नै रङमा घोलेर हाम्रो संस्कृति र राजनीतिको क्यानभास बनाउने प्रयास हो यो नाटक,’ उत्साहित हुँदै सुवेदीले भने, ‘नेपालमा नाटक बन्छन् र विश्व रंगमञ्चमा नेपाली नाटक पनि आफ्नो छुट्टै पहिचान बोकेर उभिइसकेको छ भनेर देखाउने यो अवसर र चुनौति दुवै हो।’
लामो समयदेखि लोक कला/संस्कृतिलाई आधार बनाएर काम गर्दै आएका तथा नाटकका अभिनेता दीपेश राईसँगको सहकार्यमा सुवेदीले मालिनीमा बिभिन्न जातजातिको सांस्कृतिक रङसमेत मिसाएर प्रस्तुत गर्न लागिएको बताए।
थिएटर भिलेजको आफ्नै नाटकघर बन्द भएको एक वर्ष पुगिसकेको छ। तर, उसले आफूलाई रंगकर्ममा भने निस्क्रिय राखेको छैन। नाटकघर बन्द भइसकेपछि थिएटर भिलेजले आफूलाई बेलायत, भारत र पाकिस्तानतमा प्रस्तुत गरिसकेको छ। थिएटर भिलेजको युरोप यात्रा भने पहिलो हो। युरोप यात्रापछि नाटकघर निर्माणमा जुट्ने थिएटर भिलेजका ड्रामाटर्ग रायमाझीले बताए।
