सरकारले जेन-जी आन्दोलनका क्रममा क्षति पुगेका सरकारी तथा सार्वजनिक संरचना पुनर्निर्माणमा सहयोग गर्न अपिल गरेको छ।
भौतिक पूर्वाधार तथा सहरी विकास मन्त्री कुलमान घिसिङले बिहीबार पत्रकार सम्मेलन गरेर आन्दोलनका क्रममा राष्ट्रको भौतिक संरचनामा आगजनी र तोडफोडका कारण धनजनको ठूलो क्षति भएको बताए।
प्रारम्भिक अनुमानमा एक खर्ब बराबर क्षति भएको उनको भनाइ छ।
यकिन क्षति आँकलन तथा पुनर्निर्माण गर्ने उदेश्यले सरकारले पुनर्निर्माण समिति तयार गरेको छ। उक्त समितिको अध्यक्ष अर्थमन्त्री रामेश्वर खनाल छन्।
समितिले आन्दोलनबाट क्षति भएका भौतिक संरचना पुनर्निर्माण कार्ययोजना तय र स्वीकृत गर्नेछ। क्षतिग्रस्त संरचना पुनर्निर्माण, पुनरूत्थान, राहत र पुनर्स्थापना सम्बन्धी कार्यको लागि कोष रहने भएको छ। यसका लागि भौतिक संरचना पुनर्निर्माण कोष स्थापना भएको मन्त्री घिसिङले बताए।
उक्त कोषमा योगदान गर्न समेत उनले आग्रह गरे। 'कोषमा नेपाल सरकार, प्रदेश सरकार, स्थानीय तह, निजी क्षेत्र, स्वदेशी तथा विदेशी नागरिक, गैरआवासीय नेपाली समुदाय, मित्रराष्ट्रहरू, विकास साझेदार तथा अन्तर्राष्ट्रिय संघ संस्थाहरूबाट अमूल्य योगदान गरी राष्ट्र पुनर्निर्माणको महान् अभियानमा सहभागी हुन नेपाल सरकार सबैमा हार्दिक आह्वान गर्दछ ,' मन्त्री घिसिङले भने।
-1746009348.jpg)
