रूपन्देहीको बुटवल उपमहानगरपालिका वडा नम्बर १० योगिकुटीमा रहेको विद्युत सब–स्टेसनमा आगलागी भएको छ।
नेपाल विद्युत प्राधिकरणको योगिकुटी ग्रिड भनेर चिनिने सब–स्टेसनमा आगलागी भएपछि बुटवलदेखि पश्चिम क्षेत्र अन्धकार भएको छ।
मंगलबार राती ९ बजेतिर सब–स्टेसनमा आगो लागेको थियो।
उक्त आगो प्रहरी, बुटवल र तिलोत्तमा नगरपालिकाबाट आएका दमकलले तत्काल नियन्त्रणमा लिएका थिए।
इलाका प्रहरी कार्यालय बुटवलका प्रमुख प्रहरी नायब उपरीक्षक ईन्द्र रानाका अनुसार बुटवल उपमहानगरपालिका र तिलोत्तमा नगरपालिकाको दमकलले आगो नियन्त्रणमा लिएका हुन्। तर हाल विद्युत सेवा पूर्ण रूपमा बन्द भएको उनले जानकारी दिए।
नवलपरासीको सुनवलदेखि पश्चिम नेपालको पूरै विद्युत अवरूद्ध भएको विद्युत ग्रीड महाशाखाका इञ्जिनियर सूर्य प्रसाद पाण्डेले जानकारी दिए।
ट्रान्सफर्मर जलेपछि राष्ट्रिय प्रसारण लाइनको विद्युत अवरूद्ध भएको उनले बताए।
