चैतमा बैंकहरूको खराब कर्जा थप बढ्ने देखिएको छ।
विशेषगरी निर्माण व्यवसायसँग सम्बन्धित कर्जा भुक्तानीको लागि राष्ट्र बैंकले सहुलियतको रूपमा दिएको अवधि सकिएपछि पनि खराब कर्जा थप बढ्ने भएको हो।
'आर्थिक गतिविधिमा फरक परिदृश्य देखिएको छैन,' नेपाल बैंकर्स संघका अध्यक्ष तथा माछापुच्छ्रे बैंकका प्रमुख कार्यकारी अधिकृत सन्तोष कोइरालाले भने, 'त्यसैले खराब कर्जामा सुधार देखिने सम्भावना कम छ, निर्माण व्यवसायीहरूले पाएको सहुलियत समय सकिएकोले बैंकहरूले राख्नुपर्ने केही प्रावधान बढ्ने देखिएको छ।'
यसअघिदेखि नै खराब कर्जा उच्चले बढिरहेको छ। आर्थिक वर्षको तेस्रो मसान्त (चैत) सम्ममा भने यसमा सामान्य वृद्धि हुने कोइराला बताउँछन्।
परिस्थितिवश समस्यामा परेको कारण निर्माण व्यवसायीहरूले २०८१ असार मसान्तसम्म भुक्तानी गर्नुपर्ने सावाँ र ब्याज तिर्न नसके २०८१ मंसिर मसान्तसम्म तिर्न सक्ने गरेर राष्ट्र बैंकले यसअघि समय दिएको थियो।
यस्तो कर्जाको ब्याजलाई पुँजीकरण गर्न नपाइने तथा पेनाल ब्याज/शुल्क/हर्जाना/ब्याजको ब्याज लिन नपाइने व्यवस्था समेत गरेको थियो।
तर, ऋणीले छुट पाउने अवधिभित्र कर्जाको सावाँ/ब्याज भुक्तानी नगरेमा पूर्वनिर्धारित शर्तबमोजिम सम्पूर्ण भाका नाघेको अवधिको पेनाल ब्याज लिन सक्ने व्यवस्था गरिएको थियो।
यो अवधिभित्रमा ऋणीहरूले किस्ता नियमित गर्न नसक्दा खराब कर्जा सामान्य बढ्ने र खराब कर्जाको लागि राख्नुपर्ने रकम पनि केही बढ्ने देखिएको छ।
बैंकहरूको दोस्रो त्रैमाससम्ममा भने औसत खराब कर्जा ४.९२ प्रतिशतसम्म पुगेको थियो।
सबैभन्दा धेरै कर्जा लगानी गर्ने वाणिज्य बैंकहरूको मात्रै यस्तो खराब कर्जा औसत ४.७३ प्रतिशतसम्म थियो।
चार वटा वाणिज्य बैंकहरूको खराब कर्जा पाँच प्रतिशतभन्दा माथि समेत पुगेको थियो भने १४ वटाको खराब कर्जा चार प्रतिशत माथि थियो।
यसअघि लामो समय सरकारबाट समेत निर्माण व्यवसायीहरूले भुक्तानी पाउन सकिरहेका थिएनन्। केही महिनाअघि भने अर्थ मन्त्रालयले निर्माण व्यवसायीलाई प्रक्रिया अनुसार आएका सबै दाबी भुक्तानी दिइसकेको बताएको थियो।
निर्माण व्यवसायीहरूले भने अझै पनि २०/३० अर्बभन्दा बढी भुक्तानी पाउनुपर्ने दाबी गर्दै आएका छन्। दाबी प्रक्रिया नमिलेका लगायतका कारण यस्तो भुक्तानी नभएको बुझिन्छ।
बैंकहरूको खराब कर्जा केही बढ्दा नाफामा समेत सुधार हुने सम्भावना कम देखिन्छ।
चालु आवको दोस्रो त्रैमास (पुस) सम्ममा समेत बैंकहरूको नाफा करिब पाँच प्रतिशतले घटेर २७ अर्बमा सीमित भएको थियो।
खराब कर्जामा भएको वृद्धिकै कारण बैंक तथा वित्तीय क्षेत्र दबाबमा देखिँदै आएका छन्। यसले गर्दा उनीहरूको कर्जा लगानीमा पनि प्रभाव परेको छ।
खराब कर्जा समान्य बढ्ने भए पनि ब्याज असुलीमा केही सुधार देखिएको बैंकर कोइराला बताउँछन्।
लक्ष्मी सनराइज बैंकका प्रमुख कार्यकारी अधिकृत अजय विक्रम शाह भने चैत महिनाको सुरूआतमै रहेकोले कर्जा असुलीको सम्भावना बाँकी नै रहेको र तत्कालै अवस्था प्रक्षेपण गर्न नसकिने बताउँछन्।
