रिडी पावर कम्पनीका पूर्वअध्यक्ष गुरुप्रसाद न्यौपानेले सेयरको भित्री कारोबार (इनसाइड ट्रेडिङ) गरेको विशेष अदालतले ठहर गरेको छ।
कात्तिक २३ मा सम्पत्ति शुद्धीकरण अनुसन्धान विभागले एक करोड ९९ लाख रूपैयाँ बिगो माग दाबी गर्दै न्यौपाने विरुद्ध मुद्दा दायर गरेको थियो।
न्यायाधीश टेकनारायण कुँवर, राम बहादुर थापा र मुरारीबाबु श्रेष्ठको संयुक्त इजलासले न्यौपानेलाई दोषी ठहर गरेको हो। इजलासले सजायको निर्णय गर्न भने बाँकी छ। अदालतका प्रवक्ता धनबहादुर कार्कीका अनुसार चैत १५ गते सजाय सुनाइने भएको छ।
कम्पनीको भित्री सूचनाका आधारमा सेयर खरिद–बिक्री गरेर गैरकानुनी लाभ लिएको आरोपमा विभागले मुद्दा दायर गरेको थियो।
रिडी हाइड्रोपावर कम्पनीमा अध्यक्ष रहेकै समयमा न्यौपानेले २०७७ चैतदेखि २०७८ भदौको पहिलो सातासम्म कम्पनीको सेयर किनबेच गरेका थिए।
धितोपत्र दर्ता तथा निष्कासन नियमावली २०७९ अनुसार संगठित संस्थाको सञ्चालक, कार्यकारी प्रमुख, लेखापरीक्षक, कम्पनी सचिव वा संगठित संस्थाको व्यवस्थापन वा लेखासम्बन्धी कार्यमा प्रत्यक्ष रूपले संलग्न व्यक्तिले यस्तो पदमा बहाल रहँदासम्म वा पदबाट अवकाश लिएको एक वर्षसम्म त्यो संस्था वा त्यसको सहायक कम्पनीको सेयर किनबेच तथा हस्तान्तरण गर्न पाउँदैनन्।
यी पदमा रहने व्यक्तिको आफ्नै वा उसको स्वामित्व रहेको फर्म, परिवारको नाममा रहेको सेयर समेत किनबेच गर्न नपाउने व्यवस्था छ।