देशभर सञ्चालनमा रहेका कुल २९ विमानस्थलमध्ये ११ वटा विमानस्थलको मात्रै कमाइ एक करोड रुपैयाँभन्दा माथि छ।
नेपाल नागरिक उड्डयन प्राधिकरणका अनुसार १८ वटा विमानस्थलको कमाइ कम हुँदा सञ्चालन खर्च चलाउनसमेत नपुग्ने अवस्थामा रहेको छ।
सरकार र राजनीतिक दलले मुलुकका विभिन्न स्थानमा नयाँ विमानस्थल खोल्ने तयारी गरिरहेका बेला सञ्चालनमा रहेका विमानस्थलको कमाइ नै कमजोर देखिएको हो।
सञ्चालनमा नै रहेका विमानस्थलको कमाइ न्यून हुँदा सरकारलाई ती विमानस्थल सेतो हात्तीका रूपमा पालिराख्नुपर्ने बाध्यता आइलागेको छ। त्रिभुवन अन्तर्राष्ट्रिय विमानस्थलको कमाइले नै अधिकांश विमानस्थल सञ्चालन गर्नुपर्ने र अन्य कामसमेत गर्नुपर्ने अवस्था देखिएको छ।
प्राधिकरणले सार्वजनिक गरेको सन् २०१७ को प्रतिवेदनका आधारमा त्रिभुवन अन्तर्राष्ट्रिय विमानस्थलले छ अर्ब ६२ करोड ८१ लाख २० हजार ६४ रुपैयाँ आम्दानी गरेको छ।
चन्द्रगढी विमानस्थलले दुई करोड १९ लाख ६० हजार रुपैयाँ कमाइ गरेको छ। यस्तै विराटनगर विमानस्थलले पाँच करोड ६४ लाख ७७ हजार ७९७ रुपैयाँ, तेन्जिङ हिलारी विमानस्थलले एक करोड ८६ लाख ९८ हजार ५७६ रुपैयाँ, सिमराले एक करोड २३ लाख ३९ हजार २३२ रुपैयाँ, भरतपुर विमानस्थलले दुई करोड ३८ लाख १४ हजार १४ हजार ८८ रुपैयाँ, पोखरा विमानस्थलले ६ करोड ३९ लाख १९ हजार ५०७ रुपैयाँ, गौतमबुद्ध विमानस्थलले तीन करोड ७३ लाख ५१ हजार ७०६ रुपैयाँ कमाइ गरेका छन्।
प्राधिकरणका अनुसार नेपालगञ्ज विमानस्थलले चार करोड ५६ लाख ९६ हजार २३९ रुपैयाँ, सिमीकोटले एक करोड ५४ हजार ११४ रुपैयाँ, धनगढी विमानस्थलले एक करोड २१ लाख ११ हजार रुपैयाँ कमाइ गरेका छन्।
प्राधिकरणका अनुसार थामखर्क विमानस्थलले १४ हजार ३४६ रुपैयाँ मात्रै कमाइ गरेको छ। चितवनको मेघौली विमानस्थलले २१ हजार ९७७ रुपैयाँ कमाइ गरेको छ। लामो समयदेखि व्यस्त मानिने जुम्ला विमानस्थलको कमाइ पनि आठ लाख ७६ हजार ८१० रुपैयाँ मात्रै कमाइ गरेको छ।
भोजपुर विमानस्थलले १२ लाख रुपैयाँ कमाइ गर्दा लामीडाँडा विमानस्थलले भने ८६ हजार रुपैयाँमात्रै आम्दानी गरेको छ। व्यस्त रहने जनकपुर विमानस्थलको कमाइसमेत ६१ लाख रुपैयाँमा सीमित भएको छ।
रामेछाप विमानस्थलको पाँच लाख ४० हजार ४६१ रुपैयाँ, तुम्लिङ्टार विमानस्थलको २२ लाख २० हजार ५३३ रुपैयाँ, रुम्जाटारले एक लाख २८ हजार ११७ रुपैयाँ मात्रै आम्दानी छ। मनाङको विमानस्थलले एक लाख २४ हजार ८५४ रुपैयाँ, सुर्खेत ४८ लाख ९५ हजार ४६३ रुपैयाँ, रुकुम सल्ले एक लाख ४३ लाख ७४१ रुपैयाँ, रुकुम चौरजहारी एक लाख ११ लाख १०६ रुपैयाँ, डोल्पा चार ८० हजार ३०८ रुपैयाँ, बाजुरा विमानस्थलको छ लाख १७ हजार ८९८ रुपैयाँ कमाइ छ।
रारा विमानस्थलले १७ लाख ३६ हजार ८२ रुपैयाँ कमाइ गर्दा फाप्लु विमानस्थलले २६ लाख ९० हजार रुपैयाँ आम्दानी गरेको छ।
प्राधिकरणले गत पुसको अन्तिम सातादेखि दाङको टरिगाउँ विमानस्थल सञ्चालनमा ल्याएको छ। निकट भविष्यमा नै बागलुङको बलेवा विमानस्थल पनि सञ्चालनमा ल्याउने तयारी गरिरहेको छ। सप्तरीको राजविराजमा रहेको विमानस्थल पनि सञ्चालनमा ल्याउने तयारीमा छ। यस्तै प्रदेश नं ७ को कञ्चनपुर, बैतडीको गोकुलेश्वर विमानस्थल पनि सञ्चालनमा ल्याइने तयारीमा छ।
कालीकोट, ओखलढुंगाको खिजी चण्डेश्वरी, गुल्मीको सिमीचौर, इलामको सुकीलुम्बा, अछामको कमलबजार, अर्घाखाँची र लम्जुङमा समेत विमानस्थल निर्माणमा रहेका र निकट भविष्यमा नै सञ्चालनमा ल्याउने तयारी गरिएको छ। कालीकोट विमानस्थलको धावनमार्ग निर्माण सम्पन्न भई गत वर्ष नै परीक्षण उडानसमेत भइसकेको छ। अरु विमानस्थल निर्माणको क्रममा छन्।
सञ्चालनमा रहेकामध्ये २९ वटा विमानस्थल कालोपत्र छन् । लामीडाँडा, थामखर्क, राजविराज, डोटी दिपायल, बैतडी र साँफेबगर विमानस्थल कालोपत्र गर्ने क्रम जारी छ ।
त्रिभुवन अन्तर्राष्ट्रिय विमानस्थलका महाप्रबन्धक देवानन्द उपाध्यायले अन्तर्राष्ट्रिय विमानस्थल र अरु केही विमानस्थलमात्रै सञ्चालन नाफामा रहेको र धेरैजसो विमानस्थल घाटाको व्यापार गरिरहेको बताए।
उनले भने, ‘अन्तर्राष्ट्रिय विमानस्थलको कमाइले मात्रै अरु विमानस्थल सञ्चालन गर्नुपरेको छ। त्यसले आर्थिक रुपमा समेत असन्तुलन कायम गरेको छ।’
विमानस्थल निर्माणको माग बढ्दै गएको र सञ्चालनमा समेत घाटा व्यहोर्नुपरेपछि प्राधिकरण पनि के गर्ने भन्ने मेसो पाउन सकेको छैन । राजनीतिक दबाबका आधारमा निर्माण हुने र सञ्चालन गर्नुपर्ने बाध्यतालाई प्राधिकरणले नकार्न सकेको छैन ।
प्राधिकरणका महानिर्देशक सञ्जिव गौतमले पूँजीगत लगानीका आधारमा सञ्चालनमा रहेका धेरै विमानस्थलले नाफा कमाउने सम्भावना नरहेको बताए।
उनले भने, ‘कतिपय विमानस्थल सामाजिक उत्तरदायित्वका हिसाबले मात्रै चलिरहेका छन्। नाफाभन्दा पनि सेवामूलक ढंगले मात्रै चलिरहेका छन्।’ सरकारले जनतालाई सेवा दिने लक्ष्यका साथ सञ्चालनमा ल्याएका विमानस्थलको दायित्वसमेत प्राधिकरणको काँधमा रहेको उनको भनाइ छ। हाल पोखरा, गौतमबुद्ध विमानस्थल निर्माणका क्रममा छ।
