प्रदेशसभा सांसद तथा नेकपा (माओवादी केन्द्र)का पोलिटब्यूरो सदस्य तुलाराम घर्ती (वसन्त)ले प्राकृतिक सोत र साधनको उचित प्रयोग गर्ने बताएका छन्।
प्राकृतिक सोत र साधनको उचित प्रयोगसम्बन्धी प्रदेशसभा तथा प्रदेश सरकारले नीति नियम बनाउने र जनताको लगानीमा खानी सञ्चालन गर्ने योजना बनाउने उनले बताए।
घर्तीले पाल्पामा प्रशस्त रहेका चुनढुंगा खानीलाई व्यवस्थित तरिकाले परिचालन गर्ने र दुरुपयोग हुन नदिने बताए। यस क्षेत्रमा प्रशस्त चुनढुंगा र केही फलाम खानी रहेकाले त्यसको सहीरूपमा सदुपयोग गर्न आवश्यक रहेको छ। उनले पाँच वर्षमा ५० प्रतिशत बेरोजगारी समस्या हल गर्ने गरिबमुखी कार्यक्रम ल्याउनेसमेत बताए।
प्रदेश क्षेत्रअन्तर्गत एक वडादेखि अर्को वडा कार्यालयसम्म जाने सडक विस्तार गरी ग्राभेल गर्ने काम हुनेछ। पाल्पा निर्वाचन क्षेत्र २ (ख) प्रदेश क्षेत्रका वडावडामा बाह्रै महिना यातायात सञ्चालनमा समस्या रहेको छ। प्रदेश क्षेत्रअन्तर्गत रहेको सिद्धबाबाको जोखिम कम गर्ने काम पहिलो प्राथमिकताको हुने उनले बताए।
विद्युतका पोल कुहिएकाले काठका पोल विस्थापित गरी फलामका पोल राख्न बताए। काठका पोल कुहिएकाले जतिबेला पनि विद्युत् आपूर्तिमा समस्या हुने भएकाले काठका पोल विस्थापित गर्ने योजनामा रहेको घर्तीले बताए।
खानेपानीको मुहानको अभावमा लेकका बस्तीमा लिफ्टमार्फत खानेपानीको सुविधान प्रदान गर्न आफू लागिपर्ने बताए। पाल्पामा खानेपानीको समस्या रहेकाले लेक बस्तीमा खानेपानीको समस्या समधानमा ध्यान दिने बताए। जनताका आधारभूत समस्या समधानमा केन्द्रीत हुँदै अघि बढ्ने घर्तीको भनाइ छ।
