शेष घले नेतृत्वको गैरआवासीय नेपाली संघ (एनआरएनए) उच्चस्तरीय समितिले मे ३ देखि ५ मा हुने महाधिवेशनको तयारीबारे जानकारी गराएको छ।
घले नेतृत्वको उच्चस्तरीय समितिले आज पत्रकार सम्मेलन गरी ६३ हजार ३ सय ३९ जना सदस्य भएको दाबी गरेको छ। समितिका अनुसार अधिवेशनका लागि अहिलेसम्म २ हजार ७ सय ७२ जनाले डेलिगेट्स हुन चाहेका छन्।
पत्रकार सम्मेलनमा बोल्दै समितिका संयोजक एवम् एनआरएनएका पूर्वअध्यक्ष शेष घलेले दैवी प्रकोप र काबुभन्दा बाहिरको परिस्थिति बाहेक अधिवेशन नरोकिने बताए।
उनले आफूहरूको संघर्ष संस्थालाई कसरी सुधार्ने भन्नको लागि रहेको समेत दाबी गरे।
'हामी अब पुरानो एनआरएनएमा फर्किने होइन। नयाँ एनआरएनए बनाउने हाम्रो अभियान हो,' उनले भने, '२२ वर्षमा एनआरएनएका ९० हजार सदस्य भएकोमा डेढ महिनामै हाम्रो अभियानमा झण्डै ७० हजारले चाहना राख्नु सानो कुरा होइन।'
आफूहरू अदालतको परमादेशका आधारमा चलेको भन्दै उनले मिति संशोधन हुने वा तलमाथि गर्ने छुट कसैलाई नहुने बताए।
एनआरएनएको अधिवेशनका लागि राष्ट्रिय समन्वय परिषद (एनसिसी) को अधिवेशन गर्नैपर्छ भन्ने केही नरहेको उनले बताए।
केही देशमा बाहेक धेरै देशमा एनसिसीहरू दर्ता नै नभइकन चलेकाले उनीहरूको सहभागिता हुनु/नहुनुले अर्थ नराख्ने समेत उनले बताए।
उच्चस्तरीय समितिका सदस्य कुल आचार्यले चुनाव जित्नको लागि आफू अनुकूल सदस्य बनाउँदा अहिलेको समस्या आएको तर्क गरे। विगतमा अनलाइन भोटिङ गर्न हुँदैन भन्ने पक्षमा आफू रहे पनि अनलाइन भोटिङ गरिएका कारण अहिलेको समस्या आएको उनको भनाइ छ।
उच्चस्तरीय समितिका अर्का सदस्य बिनोद कुँवरले एकता महाधिवेशन हुँदैन भनेर अनेक हल्ला फैलाइएको बताए।
'कहिले एनसिसीको अधिवेशन भएकै छैन, कहिले के भएको छैन कसरी अधिवेशन हुन्छ भनेर भ्रम फैलाइएको छ। एनसिसीहरू आफैमा स्वायत्त रहेकाले उनीहरूको अधिवेशन जुलाइमा हुने हो,' उनले भने, 'अक्टोबरमा हुन र्ने महाधिवेशन विशेष परिस्थितिले मे ३ देखि ५ मा हुन लागेको हो। त्यसैले कुनै किसिमको हल्ला र भ्रममा नपरिकन एकताको अधिवेशन सफल बनाउन म सबैसँग अपिल गर्छु।'
उच्चस्तरीय समितिकी सदस्य जानकी गुरूङले सर्वोच्च अदालतको परमादेश अनि फैसला कार्यान्वयन निर्देशनालयको पत्रपछि पनि आफूहरूले कार्यालयमा काम गर्न नपाएको बताइन्।
कानुनलाई हातमा लिनेहरूका कारण बाहिर बसेरै काम गर्दा पनि उत्साहजनक उपस्थिति रहेको उनको दाबी छ।
समितिकी सदस्य एवम् केन्द्रीय प्रचार प्रसार समितिकी संयोजक रविना थापाले एकता महाधिवेशनका लागि विभिन्न उपसमिति गठन गरेर तीव्र ढंगले काम भइरहेको बताइन्।
उनले थप समय खेर नफाली अधिवेशन सम्पन्न गर्नुको विकल्प नरहेको स्पष्ट पारिन्।
महाधिवेशनका लागि प्रतिनिधिहरू काठमाडौं आउने क्रम सुरू भइसकेकाले महाधेशनलाई सफल पार्न सबैसँग आग्रह गरिन्।
