एडिलेड नेप्लिज क्रिकेट एसोसिएसन (एनका) र एनआरएनए साउथ अस्ट्रेलियाको सहकार्यमा कर्पोरेट कप क्रिकेट प्रतियोगिता आयोजना हुने भएको छ।
यही मार्च २८ तारिख आइतबारको दिन एडिलेडको भिक्टोरिया पार्क ओभलमा बिहान ८ बजेदेखि सुपर सिक्स ए साइड क्रिकेट प्रतियोगिता हुने भएको हो।
उक्त प्रतियोगितामा साउथ अस्ट्रेलियामा रहेका नेपाली कर्पोरेट हाउसहरूको सहभागिता रहने एनआरएनए साउथ अस्ट्रेलियाका संयोजक नविन पन्तले बताए।
करिब १२ टिम सहभागी हुने अपेक्षा राखिएको उक्त क्रिकेट प्रतियोगितामा हरेक खेलहरू ५ ओभरका हुनेछन् भने ६ खेलाडीहरूले खेल्नेछन्।
कार्यक्रममा महिलाहरूको टिम एनका सनसाइन र एनआरएनए नारी निकुञ्ज साथै एनका जेम्स रेड र ब्लुको बीच मैत्रीपूर्ण खेल समेत रहेको एनका अध्यक्ष विजय जोशीले बताए।
कार्यक्रमको बारेमा थप्दै जोशीले भने, ‘एनकाले सन २०१५ देखि नै सुपर सिक्स ए साइड क्रिकेट टुर्नामेन्ट आयोजना गर्दै आएको हो तर यस वर्ष हामीले एनआरएनए साउथ अस्ट्रेलियासँग सहकार्य गर्दै यस टुर्नामेन्टलाई भव्य रूपमा अगाडि बढाउँदै छौं।’
भविष्यमा कर्पोरेट कपलाई अझै ठूलो आकार दिँदै लैजान सकेमा साउथ अस्ट्रेलियाकै प्रतिष्ठित प्रतियोगिता हुन सक्ने सम्भावना रहेको समेत जोशीले बताए।
खेल, संगीतसहित अन्य मनोरञ्जनका कार्यक्रमहरू समेत राखिएको बताउँदै साउथ अस्ट्रेलियामा बस्ने सम्पूर्ण नेपालीभाषीहरूलाई कार्यक्रममा सहभागी हुन एनका र एनआरएनए साउथ अस्ट्रेलियाले अनुरोध गरेको छ।
