'अपाच्य गीत' मा सरकारले कडाइ गर्ने भएको छ।
तीजका नाममा अपाच्य गीत आइरहेको भन्दै त्यस्ता गीत नियन्त्रण र नियमन गर्न राष्ट्रिय लोक संचारकर्मी नेपालले बिहीबार गृहमन्त्री रमेश लेखकको ध्यानाकर्षण गराएको थियो। त्यसक्रममा गृहमन्त्री लेखकले गीत संगीतको माध्यमबाट भइरहेको गलत गतिविधि रोक्न नेपाल प्रहरीको साइबर ब्युरो अन्तर्गत फोकल पर्सन तोकेरै काम थाल्ने बताए।
उनले भने, 'गीतमा अश्लिलता भो, अपमानजनक व्यवहार भयो, घृषा फैलाउने अभिव्यक्तिहरू भए भने यसमा साइबर ब्युरोले एक्सन लिन्छ। यो मेरो प्रतिबद्धता हो, सरकारकै प्रतिबद्धता हो।'
यसका लागि साइबर ब्युरोमा निवेदन भने आउनुपर्ने गृहमन्त्री लेखकको भनाइ थियो।
लोक संचारकर्मीको टीमले गृहमन्त्रीलाई ज्ञापनपत्र समेत बुझाएको थियो। तीज गीतको नाममा सामाजिक मर्यादा, सांस्कृतिक मूल्य, नैतिकता र परम्पराविरूद्धका गतिविधिहरू भइरहेकाले त्यस्ता कार्यको नियन्त्रणका लागि ध्यानाकर्षण गराइएको लोक सञ्चारकर्मी नेपालका अध्यक्ष चन्द्रमणी गौतमले बताए।
अश्लिल, भड्काउ, अपमानजनक तथा विकृत गीत–संगीतहरूको अनुगमन तथा रोकथामको लागि अधिकार सम्पन्न मौलिक कला संस्कृति संरक्षण तथा गीत संगीत विकास बोर्ड आवश्यक रहेको समेत ध्यानाकर्षण गराइएको छ।
सामाजिक सञ्जाल र युट्युबजस्ता डिजिटल प्लेटफर्महरूबाट सार्वजनिक हुने गीतहरूमा पूर्व स्वीकृति प्रणालीको विकास, लोक संस्कृति, परम्परा र नारी सम्मान प्रतिकूल सामाग्री उत्पादन तथा प्रसारण गर्ने सर्जक, गायक/गायिका र निर्माता–निर्देशकलाई कानुनी दायरामा ल्याइ कारबाही गर्न समेत लोक सञ्चारकर्मीले माग गरेको छ।
साइबर ब्युरो प्रमुख तथा प्रहरी नायव महानिरीक्षक नबीन्द अर्यालले विद्युतीय कारोबार ऐनलाई टेकेर गीत संगीतको नाममा विकृति फैलाउनेलाई कारबाही गरिने बताए।
लोक सञ्चारकर्मीले अहिले दुईवटा गीतमा प्रतिबन्ध लगाएको बताउँदै सुरूआतमा त्यसका कलाकार तथा सर्जकलाई कारबाही गर्न माग गरेको संस्थाका सचिव कमल सरगमले बताए।
गीतमा देखिएका विकृति रोक्न दोहोरीगीत प्रतिष्ठानले गरायो गृहमन्त्रीको ध्यानाकर्षण
-1746009348.jpg)
