संसारका ठूला फिल्म फेस्टिभलमा प्रदर्शन भइसकेको नवीन सुब्बा निर्देशित फिल्म 'अ रोड टु अ भिलेज' (गाउँ आएको बाटो) २२ अगस्टदेखि बेलायतमा प्रदर्शन गर्ने तयारी भएको छ।
इंग्ल्याण्डको ब्रिस्टोलस्थित फिल्म वितरक कम्पनी अण्डरग्राउण्ड स्लेटले यो फिल्म बेलायतमा प्रदर्शन गर्न लागेको हो।
फिल्म दि आसफोर्ड सिनेमा, सेभोय क्याट्रिककन, द लाइट वालसल, एक्टन लन्डन, ओडियन बेजिङस्टोक, ओडियन म्यानचेष्टर, ओडियन ग्रीनवीचसहित अल्डरसट, आसफोर्ड, बेक्सलीहिथ, बर्मिङहम, एडिनबरा, फेल्थाम र ग्लास्गोका सिने वल्र्डमा प्रदर्शन तय भइसकेको निर्माता आमोद राईले जानकारी दिए। उनका अनुसार अन्य हलहरूमा प्रदर्शन हुनेबारे समेत छिट्टै निश्चित हुनेछ।
यो फिल्म टोरन्टो अन्तर्राष्ट्रिय फिल्म महोत्सव, बुसान अन्तर्राष्ट्रिय फिल्म महोत्सव र भारतको मुम्बई फिल्म फेस्टिभलमा ‘स्क्रिनिङ’ भइसकेको छ।
फिल्ममा दयाहाङ राई, पशुपति राई, प्रसन राई, केशव राई, सुमित्रा राई, राज थापा, प्रेम सुब्बालगायतको अभिनय छ। निर्मातामा नवीन सुब्बा र आमोद राई छन्।
'गाउँ आएको बाटो' ले आमाबाबु र बच्चाबीचको सम्बन्ध चित्रण गर्छ। गाउँमा सडक पुगेपछि बाबु र छोराबीचको सम्बन्धमा आउने उतारचढाव र आधुनिकताले कसरी परिवारका सदस्यबीचको सम्बन्धलाई असर पार्छ भन्ने उजागर गरेको छ।
ग्रामीण नेपालको पृष्ठभूमिमा सेट गरिएको यो फिल्मले परम्परागत जीवनमा आधुनिकीकरणको प्रभावको अन्वेषण गर्छ।
-1746009348.jpg)
