चन्द्रकुमार भट्टराईको निर्देशनमा फिल्म 'मैना' बन्ने भएको छ। यो उनको डेब्यू निर्देशकीय फिल्म हो।
राजेन्द्र ढकाल (राहुल) ले फिल्म 'मैना' निर्माणको घोषणा गरेका हुन्। फिल्मको थिम पोस्टर सार्वजनिक गरिएको छ। थिम पोस्टरले क्राइम थ्रिलर फिल्मको संकेत गरेको छ।
सुस्मिता फिल्म्सको प्रस्तुति रहने फिल्मको कथा गोविन्द मल्लले लेखेका छन्। फिल्ममा राजेन्द्र ढकाल (राहुल) र विनिता शर्माको लगानी रहनेछ। सह-निर्मातामा रेनु शर्मा र सुस्मा खतिवडा रहनेछन्।
थिम पोस्टरले शान्त समाजभित्र अचानक आउने उथलपुथलमा आधारित कथा रहने संकेत गरेको छ। फिल्मको छायांकन भदौबाट सुरू गरिने निर्माणपक्षले जानकारी गराएको छ।
फिल्ममा को-को कलाकार रहनेछन् भन्ने निर्माणपक्षले खुलाएको छैन। निर्देशक भट्टराईले केही समयपछि कलाकारबारे जानकारी दिने बताए।
फिल्मको नाम अनुसार फिल्मको मुख्य भूमिकामा महिला कलाकार रहने अनुमान छ। यद्यपि यसबारे निर्माणपक्षले मुख खोलेको छैन।
फिल्म कहिले रिलिज हुने यसबारे पनि निर्माणपक्षले केही समयपछि जानकारी दिने निर्देशक भट्टराईले बताए।
