फिल्म 'जवाफ' निर्माण हुने भएको छ।
२०७९ सालमा प्रदर्शनमा आएको फिल्म 'छड्के २' का निर्माता प्रशान्त गिरीले यो फिल्म बनाउन लागेका हुन्।
बुधबार एक थिम पोस्टर सार्वजनिक गर्दै निर्माण कम्पनी 'काभ्रे फिल्मस्' ले 'जवाफ' निर्माणको घोषणा गरेको हो।
पोस्टरमा 'सपना पूरा गर्न अपराधको बाटो रोज्नेहरूको कथा' लेखिएको छ। हतियारसहित बस्तीको बाटोबीचमा उभिएका एक पात्रको पृष्ठभूमिमा प्रहरी भ्यानसहित देखाइएको छ। पोस्टरले फिल्म डार्क एक्सन/थ्रीलर रहेको संकेत गर्छ। पोस्टरमा उल्लेख भएका पात्रको परिचय भने खुलाइएको छैन।
यो फिल्मलाई साउथ इन्डियन निर्देशक करणले निर्देशन गर्ने उल्लेख छ। कार्यकारी निर्माताको रूपमा सञ्चारकर्मी सचित खड्का जोडिएका छन्। उनी एक दशकदेखि रंग पत्रकारितामा सक्रिय छन्।
सम्पूर्ण छायांकन भारतमा नै हुने बताइएको फिल्मको अन्य 'कास्ट एण्ड क्रू' बारे निर्माण टिमले अन्य जानकारी गराएको छैन।
'जवाफ' २०८३ सालमा प्रदर्शनमा आउने पोस्टरमा उल्लेख छ।
