साइन्स फिक्सनमा आधारित रहेर निर्माण गरिएको फिल्म 'एक्लो' टिमले अभिनेता सुरजसिंह ठकुरीको क्यारेक्टर पोस्टर सार्वजनिक गरेको छ।
पोस्टरमा उनी डरलाग्दो देखिएका छन्। उनको पात्रको नाम काल रहेको पोस्टरमा उल्लेख गरिएको छ।
'एक्लो' का निर्देशक प्रदीप शाही हुन्। शाहीको यो तेश्रो निर्देशकीय फिल्म हो। लामो समयदेखि बेलायत बस्दै आएका शाहीले ‘एक्लो’ लाई हलिउड स्तरको फिल्म बनाउने बताउँदै आएका छन्।
हाल लण्डनमा पोस्ट प्रोडक्सनको काम भइरहेको फिल्मको सम्पूर्ण काम सकिएपछि मात्रै प्रदर्शन मिति तय गरिने निर्देशक शाहीले बताए।
यो फिल्ममा प्रदीप खड्का, विजय लामा, सुनील थापा, दीया पुन, बेनिशा हमाल, दिनेश डीसी, कविता नेपाली, सुरजसिंह ठकुरी, त्रिचु राई, कृष्णभक्त महर्जन, विकास अधिकारी, दिग्गज खत्री, विनोद सुवेदी 'क्षितिज', श्रीशेष श्रेष्ठ र बाल कलाकार जेमिन श्रेष्ठ र स्योन सविक सिंहसहित बेलायती अभिनेता जेमी बेकनको अभिनय छ।
फिल्मको निर्माता राजु कुमार गुरूङ, हरि श्रेष्ठ, विष्णु तामाङ, उत्सव विष्ट, भाइराजा थापा, नवीन सिवा, बागवीर पुन हुन् भने कार्यकारी निर्माता विनोद सुवेदी 'क्षितिज' रहेका छन्। फिल्म बाबु श्रेष्ठले छायांकन गरेका हुन्।
