नेपाल साहित्य महोत्सव २०७५ को शनिबार आयोजित 'कर्टेन रेजर' मा भारतीय लेखक गुरचरण दासले आफ्नो पछिल्लो पुस्तक 'काम: द रिडल अफ डिजायर' माथि मन्तव्य राखे।
‘आदिकालीन भारतसँग अर्थपूर्ण जीवनयापन गर्न सक्ने उपाय र उत्तर थियो। हाम्रा ऋषिमुनिहरूले तीन उद्देश्य प्रस्ताव गरेका थिए— धर्म, अर्थ र काम। धर्म भनेको नैतिक स्वास्थ्य हो। अर्थ भनेको भौतिक सुखसुविधा, र तेस्रो काम। यी तीन कुरालाई मैले मेरो किताबमा नजिकबाट जान्न कोशिस गरेको छु,’ उनले भने।
सबै मानिस अर्थपूर्ण एवं सुखी जीवन बिताउन चाहने र त्यस विषयमा आफ्ना पुस्तकमा चर्चा गरेको उनको भनाइ छ।
पहिलो किताब 'इन्डिया अनबाउन्ड' मा भौतिक समृद्धिको विषय उठान गरेका गुरचरण दासले दोस्रो किताब 'द डिफिकल्टी अफ बिइङ गुड' मा नैतिक जीवनको चर्चा गरेका छन्। पछिल्लो किताब 'काम: द रिडल अफ डिजायर' भने तृष्णाको चर्चा गरेको उनले अर्थ्याए।
कार्यक्रममा संस्कृति, पर्यटन तथा नागरिक उड्डयनमन्त्री रवीन्द्र अधिकारीले आर्थिक विकास सँगसँगै कला, साहित्य र संस्कृतिको समृद्धि आवश्यक भएकाले साहित्य महोत्सवजस्ता कार्यक्रमको खाँचो औंल्याए।
लेखक शिवानीसिंह थारुले आधुनिक नेपाली साहित्य २०औं शताब्दीसँगै अघि बढेको बताइन्। त्यसको सय वर्ष पूरा भएसँगै नेपाली साहित्यले नयाँ फड्को मारिसकेको उनको भनाइ छ।
'अब नेपाली साहित्यलाई विश्व साहित्यसँग जोड्ने समय आएको छ। त्यसो गर्न सक्छौं त? मलाई लाग्छ, पक्कै सक्छौं,' उनले भनिन्, 'यसका लागि साहित्यिक उत्सव र सम्मेलनहरू आवश्यक हुन्छन् जसले नेपाली साहित्यलाई विश्व साहित्यसँग जोड्न सघाउँछ।'
बुकवर्म फाउन्डेसनले आयोजना गरेको साहित्य महोत्सवको सातौं संस्करण पुस ७ देखि १० गतेसम्म पोखरामा हुँदैछ। यसमा स्वदेश तथा विदेशका सयभन्दा बढी लेखक, साहित्यकार आउँदै छन्।
विदेशी लेखकमा मोहम्मद हनिफ, नमिता गोखले, मञ्जुश्री थापा, प्रज्ज्वल पराजुली, हरिश नाम्बियर, डा. निकोला स्ट्रिटेन सम्मेलनका मुख्य आकर्षण हुन्।
कार्यक्रममा गायक धर्मेन्द्र सेवानले रेसम फिरिरी लगायत पाँचवटा गीत गाएका थिए।
-1746009348.jpg)
