सर्जक यादव खरेलले आफ्ना सिर्जनाहरु बिहीबार मदनपुरस्कार पुस्तकालयलाई जिम्मा लगाएका छन्। छ दसक लामो कार्यावधिमा खरेलले निर्देशकका रुपमा तयार पारेका सिनेमा र रचना गरेका गीतहरुको संकलन पुस्तकालयलाई सुम्पेका हुन्।
‘पछिल्लो समय डिजिटलको प्रभाव र चरम व्यापारीकरणले गर्दा मेरा सिर्जनाहरुको अनधिकृत कारोबार रोक्नु र यसको उचित संरक्षणबारे चिन्तित थिएँ,’ पुस्तकालयमै आयोजित समारोहमा खरेलले भने, ‘यो पुस्तकालयमा पछिसम्म मेरा फिल्म र गीतहरु सुरक्षित रहने विश्वासले आजदेखि जिम्मा लगाएको छु।’
कार्यक्रममा खरेलले नेपालमा फिल्म र गीतहरुको उचित संरक्षण गर्ने सुविधा नरहेको र खूद चलचित्र क्षेत्र तथा रेडियो नेपालमा समेत यस्तो काम समयमा थालनी नहुँदा विशेषगरि रेडियोमा आफ्ना धेरै कृति नासिएर गएको गुनासो गरे। खरेलका अनुसार उनका गीतहरु २०१६ सालदेखि बज्नथालेको हो।
खरेलले आफ्ना छोरा सम्राट खरेलको सहयोगमा सबै कृतिहरुलाई डिजिटल प्रविधिमा ढालेर पुस्तकालयमा बुझाउन तयार पारिएको जानकारी दिए। पछि सम्म पनि अध्ययन अन्वेषण गर्नेहरुका लागि यी सिर्जनाहरु उपलब्ध होस् भन्ने चाहना उनले प्रकट गरे। युट्युबमा अनधिकृत रुपले छरिएको आफ्ना फिल्म र गीतहरुलाई धमाधम नियन्त्रित गर्ने काम गरिरहेको जानकारी पनि उनले दिए।
‘खरेलका कृतिलाई पुस्तकालयले सुरक्षित रुपले राख्ने र उहाँको सरोकारका कुरालाई ध्यान दिइने जानकारी गराउँछु,’ कार्यक्रममा पुस्तकालयका तर्फबाट बोल्दै कनकमणि दीक्षितले भने, ‘मुलुकका अन्य सर्जक तथा उनीहरुका सन्ततीलाई पनि महत्वपूर्ण कृति पुस्तकालयलाई जिम्मा दिएर भविष्यका निम्ति सुरक्षित पारिदिनुहुन अनुरोध गर्दछु।’
खरेलले दीक्षितलाई प्रदानगरेको विभिन्न कागजपत्र र सय गिगाबाइटको हार्डडिस्कभित्र दुइ सयजति गीत र सातवटा सिनेमा छन्।
यसअघि पनि अमेरिकाको युनिभर्सिटि अफ क्यालिफोर्निया लस एन्जलसले खरेलका दुइ फिल्म ‘भानुभक्त’ र ‘प्रेमपिण्ड’को पहिलो प्रिन्ट सुरक्षित संरक्षण गर्नेगरि जिम्मा लिइसकेको छ।
-1746009348.jpg)
