सिर्जना कलेज अफ फाइन आर्टस र सिर्जना कन्टेम्पोरी आर्ट ग्यालरीको संयुक्त आयोजनामा ‘सिर्जना २०१८’ को आज अन्तिम दिन हो।
बबरमहलस्थित नेपाल आर्ट काउन्सिलमा भइरहेको प्रदर्शनीमा कला क्षेत्रमा संलग्न कलेजका संस्थापक, सदस्य, शिक्षकलगायत ग्यालरीमा आबद्ध कलाकारहरूको कला राखिएको छ।
यसमा अनुभव बटुलेका पाका कलाकार, संभावना बोकेका कलाकार र नयाँ पुस्ता गरेर ३ पुस्ताको फ्युजन देख्न सकिन्छ। बिहिबारसम्म चल्ने प्रदर्शनीमा पेन्टिङ, मुर्तिकला, मिक्स मिडिया लगायतका विभिन्न माध्यमबाट ३१ कलाकारले आफ्नो कला प्रस्तुत गरेका छन्।
देवेन्द्र पाण्डे
यी बीचमा देवेन्द्र पाण्डेको कला अन्यभन्दा भिन्न छ। ‘पप अप’ नामाकरण गरिएको उनको कलामा कागजको क्राफ्टहरू छन्। यी क्राप्टमार्फत् उनले नेपालको सांस्कृतिक सम्पदा अनि आधुनिकीकरणलाई समेटेका छन्। ‘अरिगामी’ कलाजस्तै देखिने उनको क्राफ्ट थ्री डाइमेन्सनल छन् र ग्रिटिङ जसरी फोल्ड पनि गर्न मिल्छन्।
‘केही नविनतम् प्रयासका लागि ‘पप अप’ रोजेको हुँ,’ पाण्डेले भने, ‘यो देख्दा जति सजिलो छ बनाउन त्यति नै गाह्रो छ। अलिकति बिग्रियो भने मेहेनत सबै खेरा जान्छ।’
सन् २००३ मा पाण्डेले ‘पप अप’को एकल प्रदर्शनी गरिसकेका छन्। नयाँ अनि पुराना कलाहरू समेटेर अर्को प्रदर्शनी गर्ने योजना रहेको उनले बताए।
शरद रञ्जित
बुधबार प्रदर्शनीमा भेटिएका पाका कलाकार सरद रन्जितको दुई पेन्टिङ पनि प्रदर्शनीमा छन्। इलुस्ट्रेसन, कार्टुन लगायतमा लामो समय बिताएका उनले ‘डान्सिङ कलर्ज’ सेरिजमा ‘एब्स्ट्रयाक्ट’ पेन्टिङ गरिरहेका छन्।
डान्सिङ कलर्जमार्फत् रंगका विभिन्न आयाम देखाउन खोजेको रन्जितले बताए।
‘नृत्य संसारभरि नै चलिरहने एक प्रकारको कला हो,’ उनले भने, ‘यसले विभिन्न जातजाति, कला संस्कृति, भूगोललाई पनि जोडेको हुन्छ। विभिन्न रंगहरूको फ्युजनमा मैले यही देखाउन खोजेको हो।’
रोशन भण्डारी
यस्तै, अर्का कलाकार रोशन भण्डारीले ‘कन्टेम्प्लेसन’ थिममा ५ कला प्रदर्शन गरेका छन्। उनको कलामा फिग्रेटिभ कम्पोजिसन छ जसको पृष्ठभूमि भने एब्स्ट्रयाक्ट छन्। उनले प्रत्येक चित्रमा एउटा मात्रै पात्र उतारेका छन्। रंगहरूको समायोजनमा चित्रमार्फत् पात्रको मनोभावलाई भण्डारीले देखाउन खोजेका छन्।
‘एक्लै बस्नुको मज्जा नै बेग्लै हुन्छ। मानिसहरू एक्लै बस्दा कसरी सोच्छन्? भनेर देखाउन चाहेको हो,’ उनले भने, ‘चित्रमा धेरै पात्रको प्रयोग हुँदा एकअर्काको मनोभावना बिथोलिइरहेको हुन्छ। एउटै मात्र बनाउँदा दर्शकहरू पनि त्यसैमा केन्द्रीत हुन पाउँछन्।’
योसँगै घोडाको पेन्टिङ बनाएर पहिचान बनाएका पाका कलाकार शशी शाहको ‘प्यारानोएड हर्स’, सारदमान चित्रकारको ‘इन्टरएक्टिभ आर्ट’, कृष्ण मानन्धरको ‘रक सेरिज’ लगायतका ८० कला प्रदर्शनीमा देख्न सकिन्छ।
सबै तस्बिरहरू : नारायण महर्जन/सेतोपाटी
-1746009348.jpg)
