आयोजक विर्तामोड फुटबल क्लबलाई टाइब्रेकरमा हराउँदै पाहुना टोली रोयल स्पोर्टिङ क्लब दमक तमु ल्होसार गोल्डकप अन्तर्राष्ट्रिय महिला नकआउट फुटबल प्रतियोगिताको सेमिफाइनलमा प्रवेश गरेको छ।
विर्तामोडको डोमालाल राजवंशी रंगशालामा शनिबारदेखि सुरू भएको खेलमा टाइब्रेकरमा दमक ४-२ ले विजयी भएको हो।
खेल अवधिभर दुवै टोलीले गोलरहित बराबरी खेलेपछि खेल टाइब्रेकरमा धकेलिएको थियो। पहिलो हाफमा दुई टोलीले सामान्य खेल खेले पनि दोस्रो हाफमा आयोजक केही आक्रामक देखिएको थियो।
भर्खरै बंगलादेशमा सम्पन्न यु-१९ साफ महिला फुटबल खेलेकी कुसुम खतिवडा खासै चल्न नसक्दा आयोजकले गोल गर्ने अवसर गुमायो। खेलको १० औं मिनेटमा कुसुमको क्रस बललाई दमककी गोलरक्षक सजिया छेत्रीले बचाइन्।
त्यस्तै, खेलको १५ औं मिनेटमा दमककी पार्वती राईको प्रहार बिर्तामोडकी गोलरक्षक झरना नगरकोटीले छेकिन्। ३९ औं मिनेटमा दमककी ममता राउतको प्रहार गोलपोस्ट नजिकबाट बाहिरियो।
खेलको प्लेयर अफ द म्याच दमककी गोलरक्षक सजिया भइन्। उनलाई आयोजक विर्तामोड फुटबल क्लबका अध्यक्ष डिके गुरुङले नगद प्रदान गरे।
दोस्रो संस्करणको प्रतियोगिताको विजेताले एक लाख ११ हजार १११ रुपैयाँ, ट्रफी, मेडल र प्रमाणपत्र पाउने छ भने उपविजेताले ५१ हजार १११ रुपैयाँ, ट्रफी, मेडल र प्रमाण पत्र प्राप्त गर्ने छ।
गुरुङ समुदायको महान चाड तमु ल्होसारको अवसरमा प्रतियोगिता आयोजना गरिएको हो।
-1746009348.jpg)
