मुस्ताङबाट पोखरा फर्कने क्रममा बेलायती पर्यटकको बिहीबार मृत्यु भएको छ ।
२२ वर्षिय युवती चार्लोट इमा क्याथरिन फुफुर्लेटोनको पहिरोमा परी मृत्यु भएको प्रहरीले जनाएको छ । मुस्ताङको थासाङ गाउँपालिकाको वडा नम्बर ४ स्थित घोप्टेभीरमा माथिबाट खसेको ढुङ्गा लागेर गम्भीर घाइते भएकी पर्यटकको मृत्यु भएको प्रहरीले जानकारी दिएको छ ।
ढुङ्गा लागेर घाइते भएकी इमालाई उपचारका लागि लेतेको प्राथमिक स्वास्थ्य केन्द्रमा लैजादै गर्दा मृत्यु भएको हो । घोप्तेभीरमा पहिरो गएका कारण बिहानदेखि अवरुद्ध भएपछि उनी सहितको टोली र अन्य पर्यटकहरु पनि रोकिएका थिए ।
सोही क्षेत्रमा गत शनिबार माथिबाट खसेको ढुङ्गा लागेर एपिवान टेलिभिजनका क्यामरा पर्सन उत्सल पाठक गम्भीर घाइते भएका थिए । उनको अहिले पोखराको मणिपाल अस्पतालमा उपचार भइरहेको छ । घाइते पाठकको तत्कालै हेलिकप्टरबाट पोखरा ल्याएर उपचार भएको थियो ।
उनको टाउकोमा गम्भीर चाट लागेका कारण टाउकोको सर्जरी भएको छ । उनको अहिले स्वास्थ्यमा सुधार आएको चिकित्सकले जानकारी दिएका छन् ।
