हङकङको अपार्टमेन्टमा भएको आगलागीमा घटीमा ११२ जनाको मृत्यु भएपछि चीनले देशभरिका अग्ला भवनहरूको आगलागी सुरक्षा निरीक्षण गर्ने भएको छ।
सो अभियानले बाहिरी भित्ताको मर्मत वा भित्री परिमार्जन भइरहेका उच्च घनत्वका आवास, साथै अस्पताल, कार्यालय भवन र आवासीय कम्पाउन्ड जस्ता सार्वजनिक भवनहरूमा ध्यान केन्द्रित गर्नेछ भनेर चीनको आपतकालीन व्यवस्थापन मन्त्रालयले घोषणा गरेको छ।
'जनताको जीवन र सम्पत्तिको प्रभावकारी रूपमा सुरक्षा गर्न हामीले अग्ला भवनहरूको आगलागी सुरक्षा व्यवस्थापनलाई व्यापक रूपमा सुदृढ गर्नुपर्छ,' मन्त्रालयले भन्यो।
स्थानीय अधिकारीहरूलाई निरीक्षण गर्न र आवश्यक परेमा तत्काल सुधारात्मक कारबाही गर्न समेत निर्देशन दिइएको भनेर फाइनान्सियल टाइम्सले लेखेको छ।
'गम्भीर उल्लङ्घनका विरुद्ध कडा कार्यान्वयनका उपायहरू अपनाइनेछ र ठूला सुरक्षा खतराहरू नहटाउनेहरूलाई जवाफदेही बनाइनेछ,' मन्त्रालयले थप्यो।
निरीक्षणले इन्सुलेशनका लागि कुनै प्रज्वलनशील सामग्री प्रयोग गरिएको छ वा बाहिरी भागको मर्मत गर्न बाँसको संरचना खडा गरिएको छ कि छैन भनी जाँच गर्नेछ। त्यस्तै आगलागी सुरक्षा उपकरण र आपतकालीन निकासी मार्गहरू काम गरिरहेका छन् भनेर पनि सुनिश्चित गर्नेछ।
बुधबार हङकङमा दशकौँयताको सबैभन्दा ठूलो आगलागी भएको थियो।
हङकङका अधिकारीहरूका अनुसार शनिबारसम्म मृत्यु हुनेको सङ्ख्या १२८ पुगेको छ। प्रहरीले बेपत्ता भएका १४४ बासिन्दाहरू फेला परेको र सुरक्षित रहेको, र अन्य ८३ जना घाइते भएको जनाएको छ। अझै १५० जनासम्म बेपत्ता रहेको बताइएको छ।
मर्मतका क्रममा बाहिरपट्टि थपिएको प्रज्वलनशील संरचना क्ल्याडिङ र मर्मत गर्न बनाइएको बाँसको संरचनाका कारण ३० तला भन्दा अग्ला भवनहरूमा आगो छिटो फैलिन मद्दत गरेको प्रारम्भिक आँकलन गरिएको छ।
त्यसपछि फेरि त्यस्तो गटना नदोहोरियोस् भनेर चीनको केन्द्र सरकारले देशभरि नै आगलागी सुरक्षा निरीक्षण गर्न निर्देशन दिएको हो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
