उच्च अदालत तुलसीपुर इजलास नेपालगञ्जमा तोडफोड, चोरी र आगजनी गरेको आरोपमा ६ जनालाई पक्राउपछि सार्वजनिक गरेको छ।
पक्राउ पर्नेमा नेपालगञ्ज उपमहानगरपालिका–४ का रविकुमार वैश्य, नेपालगञ्ज – १० का बब्लु गोडिया, नेपालगंज – ९ का गंगा सागर बर्मा, वडा नं. ५ का ताहिर हलवाई, वडा नं. ४ का एशन राज शिद्धिकी र वडा नं. ९ का ओमराज सोनी रहेका छन्।
जेनजी आन्दोलनका क्रममा भदौ २४ गते अदालतको इजलासमा तोडफोड, चोरी तथा आगजनी गरेको आरोपमा पछिल्लो समय प्रहरीले उनीहरूलाई पक्राउ गरी अनुसन्धान भइरहेको जिल्ला प्रहरी प्रमुख एसपी अंगुर जिसीले बताए।
जिल्ला अदालतले आपराधिक प्रवेश तथा आपराधिक उपद्रव सम्बन्धी कसुरमा उनीहरूलाई पाँच दिन थुनामा राखेर अनुसन्धान गर्न समय प्रदान गरेको एसपी जिसीले बताए।
बाँके प्रहरीले यसअघि सरकारी वकिल कार्यालयमा तोडफोड, चोरी र आगजनी गरेको आरोपमा थप चार जनालाई पक्राउ गरेको थियो। उनीहरू माथिको अनुसन्धान पनि जारी रहेको प्रहरीले जानकारी दिएको छ।
दाङमा थप दुई जना पक्राउ
भदौ २४ गते जेनजी आन्दोलनका क्रममा अस्थायी प्रहरी पोष्ट तुलसीपुर बसपार्क र बसपार्कमा रहेका विभिन्न समितिका काउण्टरहरूमा तोडफोड र चोरी गरेको आरोपमा प्रहरीले थप दुई जनालाई पक्राउ गरेको छ।
पक्राउ पर्नेमा तुलसीपुर उपमहानगरपालिका–५ बसपार्क बस्ने २८ वर्षीय विशाल परियार र तुलसीपुर–९ बस्ने २७ वर्षीय राजकुमार वली रहेका छन्।
जिल्ला अदालतले आपराधिक प्रवेश तथा आपराधिक उपद्रव सम्बन्धी कसुरमा उनीहरूलाई पाँच दिन थुनामा राखेर अनुसन्धान गर्न समय प्रदान गरेको जिल्ला प्रहरी प्रवक्ता डिएसपी चक्रबहादुर शाहले जानकारी दिएका छन्।
तुलसीपुर क्षेत्रबाट यसअघि प्रहरीले थप पाँच जनालाई पक्राउ गरेको थियो। त्यस्तै जिल्लाभर हालसम्म प्रहरीले सोही अभियोगमा २६ जनालाई पक्राउ गरी अनुसन्धान भइरहेको जानकारी दिएको छ।
बाँके र दाङ प्रहरीका अनुसार हालसम्म व्यक्ति विशेषबाट जाहेरी परेको छैन।
जिल्ला र उच्च अदालतमा तोडफोड, लुटपाट र आगजनी गरेको अभियोगमा परेको जाहेरीका आधारमा अनुसन्धानपछि उनीहरूलाई पक्राउ गरिएको हो।
-1746009348.jpg)
