बंगलादेशको राजधानी ढाकामा शृंखलाबद्ध बम विस्फोट र आगजनीको घटना भएपछि उच्च सतर्कता अपनाइएको छ।
ढाकाका सार्वजनिक यातायात, धार्मिक स्थल तथा सरकारी कार्यालयहरू लक्षित विस्फोट र आगजनी भएको बंगलादेशी अनलाइन द डेली स्टारले जनाएको छ।
शृंखलाबद्ध आक्रमण सहर आतंकित बनेको छ।
डेली स्टारले ढाका प्रहरीलाई उद्धृत गर्दै मंगलबार ११ ठाउँमा विस्फोटका घटना भएको उल्लेख गरेको छ। ती विस्फोटमा घरेलु तरिकाले बनाइएको 'क्रुड बम' प्रयोग भएको पनि प्रहरीले जनाएको छ।
दिनभर तीनवटा बसमा आगजनी भएको पनि बताइएको छ। मंगलबार बिहान ३:४५ बजे अन्तरिम सरकार प्रमुख मोहम्मद युनुसले स्थापना गरेको ग्रामीण बैंकको मुख्यालयअगाडि पहिलो विस्फोट भएको थियो।
त्यतिबेला दुई जना व्यक्तिहरू मोटरसाइकलमा आएका र बम फ्याँकेर फरार भएको प्रहरीको भनाइ छ।
त्यसपछि बिहानै माछा तथा पशुपालन सल्लाहकार फरिदा अख्तरसँग सम्बन्धित व्यवसायिक संस्था ‘प्रवर्तन’मा अर्को बम आक्रमण भएको थियो। त्यस्तै, बिहान साढे सात बजे धानमण्डीस्थित इब्न सिन्हा अस्पताल र मिडास सेन्टर वरपर चार वटा बम प्रहार गरिए।
साँझदेखि राति सम्म ढाकाका विभिन्न स्थानहरूमा थप विस्फोटहरू भएका थिए।
मौचक, अगारगाँवस्थित बंगलादेश बेटार अगाडि, खिलगाँउ फ्लाइओभर र मिर्पुरको शाह अली मार्केट क्षेत्रमा क्रमश विस्फोट भएका थिए। अन्तिम आक्रमण राति ११ बजेतिर बङ्गला मोटरस्थित नेशनल सिटिजन पार्टी (एनसीपी) कार्यालयमा भएको थियो, जसमा एक सर्वसाधारण सामान्य घाइते भएका छन्।
एनसीपीका संयुक्त सदस्य सचिव मुश्फिक उस सालेहिनका अनुसार घटनास्थलबाट एउटा नफुटेको बम बरामद गरिएको र पाँच जना संदिग्धलाई स्थानीयले पक्राउ गरी प्रहरीलाई बुझाइएको छ।
यसअघि शुक्रबार पनि काक्राइलस्थित सेन्ट मेरी क्याथेड्रल र मोहम्मदपुरमा रहेका धार्मिक आवासमा बम फ्याँकिएको थियो। त्यसै दिन बिहान शाहजादपुर र मेरुल बड्डामा दुई बस जलाइएको र राति धानमण्डीमा अर्को बसमा आगजनी भएको प्रहरीको विवरणमा उल्लेख छ।
घटनापछि ढाका महानगर प्रहरीले प्रमुख सरकारी निकाय वरिपरि सभा–जुलुसमा प्रतिबन्ध लगाएको छ।
नोभेम्बर १३ मा पूर्व प्रधानमन्त्री शेख हासीना विरुद्धको मुद्दाको फैसला मिति तय छ। त्यसअघि सुरक्षा अझ कडा पारिएको बताइएको छ।
प्रहरी मुख्यालयले सबै थानाहरूलाई गस्ती र निगरानी बढाउन निर्देशन दिएको
छ। प्रमुख सल्लाहकारको प्रेस विङ्गले जारी विज्ञप्तिमा अपराधी पत्ता लगाउन ढाका महानगर प्रहरी र र्यापिड एक्सन बटालियनले सहरव्यापी खोज अभियान सुरु गरेको जनाएको छ।
प्रेस विङ्गले धार्मिक सद्भाव बिगार्ने कुनै प्रयास कानुनी कठोर कारबाहीको दायरामा ल्याइने चेतावनी पनि दिएको छ।
आक्रमणहरू सत्तारूढ अवामी लिगद्वारा नोभेम्बर १३ मा घोषित “ढाका लकडाउन”को आह्वानसँगै मिल्ने गरी भएका हुन्। यद्यपि, दलका सबै राजनीतिक गतिविधि हाल प्रतिबन्धित छन्।
प्रहरीको डिटेक्टिभ ब्रान्चका प्रमुख साफीकुल इस्लामका अनुसार, यस घटनामा संलग्नको खोजी तीव्र पारिएको छ र ३४ जना अवामी लिग कार्यकर्ता योजनाबद्ध दंगा र आर्थिक सहयोग आरोपमा पक्राउ परेका छन्। एक जना छात्र लिग सदस्य पनि बम विस्फोट घटनामा संलग्न आरोपमा पक्राउ परेका छन्।
घटनापछि ढाकामात्र होइन, देशभरका महत्वपूर्ण संरचनामा पनि सुरक्षा कडा पारिएको छ। रेलवे, धार्मिक स्थल, विद्यालय र अस्पतालहरूमा विशेष निगरानी सुरु गरिएको छ।
रेलवे विभागले पट्री, स्टेशन र इन्धन भण्डारण केन्द्रहरूमा रात्री गस्ती, सिसिटिभीबाट निगरानी र परिचयपत्र जाँच अनिवार्य गरेको छ। त्यस्तै, ढाका मेट्रो रेल सञ्चालन गर्ने डिएमटिसिएलले सम्भावित अस्थिरता पूर्वानुमान गर्दै सबै कर्मचारीको बिदा रद्द गरेको छ।
बंगलादेश प्रहरी प्रवक्ता एएचएम साहदल हुसैनले देश अस्थिर पार्ने हरेक प्रयासलाई दृढतापूर्वक रोक्ने बताएका छन्।
'पूर्वनिर्वाचन हिंसा बंगलादेशमा नयाँ होइन, तर यसपटक हामी सजग र तयारी अवस्थामा छौं,' उनले भने।
गृह मन्त्रालयका वरिष्ठ अधिकारीले राष्ट्रिय एकता र सार्वजनिक सुरक्षा सुनिश्चित गर्नु मुख्य प्राथमिकता रहेको बताएका छन्।
-1746009348.jpg)
