अन्नपूर्ण सर्किट पदयात्रामा गएका भारतीय पदयात्री पिन्टु मुखर्जीको मंगलबार लेक लागेर मृत्यु भएको छ।
माथिल्लो मनाङको लेदर (४२०० मि) उचाइमा पुगेपछि ५४ वर्षीय मुखर्जी छाती दुख्यो भन्दै ढलेका थिए।
मोटर बाटोबाट करिब ५ घण्टा पैदल हिँडेपछि पुगिने उक्त स्थानमा मुखर्जी ढलेको सूचना आएपछि १३ जना प्रहरी उनको उद्धारमा गएको थियो।
लेदरबाट झण्डै ६ घण्टा स्ट्रेचरमा बोकेर स्वास्थ्य संस्था पुर्याउँदा पिन्टुको मृत्यु भएको स्वास्थ्यकर्मीले जानकारी गराएका थिए।
पिन्टुको शव पोष्टमर्टम गर्न काठमाडौंको टिचिङ अस्प्ताल पठाएको मनाङ प्रहरी प्रमुख डिएसपी हरि पौडेलले बताए।
शवसँगै उनका साथीहरू पनि काठमाडौं फर्कंदैछन्।
अन्नपूर्ण सर्किट पदमार्गमा सबैभन्दा उच्च हिमाली भञ्ज्याङ थोराङपास (५४१६ मि) पार गर्नु सबैभन्दा अप्ठ्यारो मानिन्छ। थोराङ पास गरेपछि मुस्ताङको मुक्तिनाथ निस्किन्छ। मुक्तिनाथको बाटो भएर जोमसोम हुँदै पोखरा पुगेर पदयात्रा सकिन्छ।
अन्नपूर्ण क्षेत्रमा लेक लागेर यस वर्ष मात्र ४ जना पदयात्रीको मृत्यु भइसकेको छ।
-1746009348.jpg)
