गएको बिहीबार झापा मेचीनगर–१४ स्थित निचाझोडा जंगलको हातेमालो सामदायिक वन परिसरभित्र एउटा कार शंकास्पद रूपमा जलिरहेको अवस्थामा फेला पर्यो।
चारआलीबाट झापा सदरमुकाम चन्द्रगढी जाने बाटोबाट झण्डै २ सय मिटर कार जलिरहेको देखेपछि स्थानीयबासीले होहल्ला गरे, प्रहरीलाई गुहारे।
जलेको कारण कारको नम्बर प्लेट तत्कालै यकिन हुन सकेन। स्थानीयबासीले एउटा कारलाई बलपूर्वक जंगलतिर लैजाँदै गरेको देखेको र त्यसको केहीबेरमा आगो लागेको हुँदा चालकले नै कारमा आगो लगाएको हुनसक्ने बताएका थिए।
यसपछि प्रहरीले अनुसन्धान थाल्यो। अनुसन्धानका संलग्न एक प्रहरी अधिकृतका अनुसार कार जलिरहेको ठाउँभन्दा नजिकै एउटा चप्पल भेटिएको थियो, जसले यो घटनाको पहेली फुकाउन सहयोग गर्यो।
अनुसन्धानका क्रममा त्यो कार झापाकै शिवसताक्षी नगरपालिका-१० का ३३ वर्षीय सरोज शर्माको रहेको खुल्यो। जसलाई उनकै छिमेकी दुई युवाले हत्यापछि विरिङ पुलमुनी गाडेका थिए। र, प्रमाण मेटाउन उनको कारमा आगजनी गरेका थिए।
उनको हत्यामा संलग्न रहेको अभियोगमा झापा प्रहरीले आइतबार दुई जनालाई सार्वजनिक गरेको छ।
जिल्ला प्रहरी कार्यालय झापाका डिएसपी खगेन्द्रबहादुर खड्काका अनुसार शर्माको हत्या सोही ठाउँका २७ वर्षीय सुनिल साह र २३ वर्षीय राहुल साहले गरेको प्रारम्भीक अनुसन्धानबाट खुलेको छ। उनको हत्यामा संलग्न अर्का एक जना भारतीयसमेत रहेको र उनी फरार रहेको उनले जानकारी दिएका छन्।
काठमाडौंमा व्यवसाय गरेर बस्दै आएका सरोज शर्माले सस्तो मूल्यमा सुन किन्न पाए किन्ने र काठमाडौंमा लगेर बेच्ने योजना सुनिल साहलाई सुनाएका थिए। प्रहरीका अनुसार यो एक महिना अघिको कुरा हो।
‘त्यसबेला सरोजको योजना सुन्ने बित्तिकै उनीबाट पैसा लुट्ने योजना बनेको रहेछ,’ डिएसपी खड्काले भने, ‘पैसा लुट्ने, उनलाई अपहरण गरी भारत लैजाने र त्यहाँ बन्धक बनाएर फिरौती असुल्ने योजना बनेछ।’
चाडपर्वका बेला काठमाडौंबाट सरोज झापा आए। सस्तो सुन खोज्ने जिम्मा लिएका सुनिल साहले आफूले सुन लिइसकेको र माटोमा गाडेर राखेको जानकारी दिए। गाउँकै छिमेकी भाइको भर गरेर सरोज सुनिलको साथ लागेर हिँडे।
प्रहरीका अनुसार सुनिलले सरोजलाई झापाकै अर्जुनधारा नगरपालिका–४ मा रहेको दहीझोडा सामुदायिक वन क्षेत्रमा कात्तिक ९ को साँझतिर पुर्याएका थिए। त्यही दिन साँझ साढे ५ बजे एकान्त जंगल क्षेत्रमा पुगेपछि सुनिल र उनका भान्जा राहुल साहले हथौडा प्रयोग गरेर हत्या गरेको देखिएको प्रहरी भनाइ छ।
उनको हत्या गरेपछि सरोजकै बा.प्र. ०१–३० च ७१९४ नम्बरको कारमा उनको शव हालेर झापा गाउँपालिका–५ मा रहेको हुलाकी मार्गस्थित बिरिङ खोलाको पुलमुनि लगेर गाडेको बयान अभियुक्तहरूले दिएका छन्।
कात्तिक ९ गतेबाट हराएका शर्मा फेला नपरेपछि उनका परिवारले प्रहरीलाई जानकारी गराएका थिए। र खोजतलासको क्रममा उनको सवारी साधन कात्तिक १३ गते मेचीनगर १३, निचाझोडा सिमसार क्षेत्रमा जलिरहेको अवस्थामा फेला परेको थियो।
उनको शव चाहिँ शनिबार विरिङ पुलमुनी भेटिएको थियो।
पक्राउ परेका मामाभान्जाविरुद्ध अपहरण, शरीर बन्धक, अपराधिक प्रवेश तथा आपराधिक उपद्रव तथा ज्यान सम्बन्धि कसुरमा जिल्ला अदालत झापाबाट ७ दिनको अनुसन्धान म्याद लिएर थप अनुसन्धान सुरू गरिएको प्रहरीले जानकारी दिएको छ।
पक्राउ परेका मध्ये सुनिललाई विराटनगर रानीमा कोशी प्रदेश प्रहरी कार्यालयको टोलीले पक्राउ गरेको र राहुललाई भने घरैबाट पक्राउ गरिएको हो।
-1762089426.jpg)
-1746009348.jpg)
