काठमाडौंमा रहेको नेपाली सेनाको मुख्यालय जंगी अड्डामा एक युवक मध्यराति छिरेर तोडफोड भएको खुलेको छ।
असोज १८ गते मध्यराति ११ बजे एक युवक जंगी अड्डा प्रवेश गरी भोलिपल्ट पौने १२ बजेमात्रै निस्किएको खुलेको हो।
उनी सिन्धुली घर भई काठमाडौंको न्युरोड बस्ने २४ वर्षीय राहुल बोगटी हुन्।
उनले जंगी अड्डा परिसरमा रहेको तारबार नाघेर त्रिभुवन आर्मी अफिसर क्लब सभामण्डप भवन भित्र रहेको ड्राइ सौनामा छिरेर तोडफोड गरेका थिए।
यसरी तोडफोड गर्दा ३७ हजार २०० रुपैयाँ बराबरको क्षति भएको जंगी अड्डाले आफ्नो जाहेरीमा उल्लेख गरेका छन्।
उनी त्यसराति महिला शौचालयमा लुकेर बसेका थिए। भोलिपल्ट ११:५० बजेमात्रै क्लबको गेटबाट बाहिर निस्किन खोज्दा बारबाट हामफालेपछि मात्रै सेनाले थाहा पाएको थियो।
पछि उनलाई सेना र प्रहरीले मिलेर खोजेको थियो।
खोजी गर्ने क्रममा उनलाई काठमाडौं-२८ संकटा मन्दिरमा फेला पारेको हो। उनीमाथि प्रहरीले आपराधिक उपद्रव कसुरमा कात्तिक १२ गते जिल्ला अदालत काठमाडौंमा मुद्दा दर्ता गरेको छ। अनुसन्धान तथा कारबाहीका लागि सैनिक प्रहरी गण जंगीअड्डाले जिल्ला प्रहरी परिसर काठमाडौंमा पत्र लेखेपछि अनुसन्धान अघि बढाएको थियो।
पक्राउ परेका बोगटी ज्याला मजदुरी गर्ने व्यक्ति हुन्।
उनले त्यसदिन आफ्नो होस गुमेपछि जंगी अड्डा प्रवेश गरेको बयान दिएका छन्।
‘एक्कासि न्युरोडबाट पैदल हिँड्दै आउँदा राति ११ बजे सहीदगेट पुग्दा मलाई एक्कासि के भयो भयो, मैले होस नै गुमाएँ। एक्कासि नेपाली सेनाको तारबार नाघेर भित्र प्रवेश गरेको रहेछु,’ उनले भनेका छन्, ‘होसमा नभएको हुँदा मैले कहाँ के गरे र कहाँ सुते सो कुरा मलाई थाहा भएन।’
उनले अर्को दिन ११:४५ बजे होसमा आउँदा मलाई सेना र प्रहरीले पक्राउ गरेको भन्ने थाहा पाएको बताए।
-1746009348.jpg)
