बाँकेको नेपालगन्जमा सामाजिक तथा धार्मिक सदभाव बिथोलिने गरी असोज १७ भएको विवादपछि स्थानीय प्रशासनले निषेधाज्ञा नै जारी गर्नुपरेको थियो।
त्यस दिन दिउँसो हिन्दुधर्मावलम्बीहरूले विगतका वर्षहरूजस्तै झाँकीसहित दुर्गा मूर्ति विसर्जन र्याली गरेका थिए।
र्यालीमा विवाद भने फोहोरका कारण सुरू भएको थियो।
र्यालीमा सहभागी भक्तजनमाथि घरको माथिबाट फोहफोर फालेको भन्दै सोही विषयलाई लिएर हिन्दु र मुस्लिम समुदायबीच मुठभेडको अवस्था भयो। त्यसपछि स्थानीय प्रशासनले निषेधाज्ञा जारी गरेको थियो।
यसबीच प्रहरीले अनुसन्धान गरी फोहोर फाल्ने व्यक्तिको खोजबिन गरी असोज २१ गते पक्राउ गर्यो। जिल्ला प्रहरी कार्यालयले विवादमा संलग्न दुवै पक्षलाई झिकाएर कानुनी कारबाहीको प्रक्रिया सुरू गर्यो।
जिल्ला प्रहरी कार्यालयमा भएको छलफलबाट फोहोर फालेको आरोप खेपेका व्यक्तिले जानाजान नभई गल्ती भएको स्वीकार गरी क्षमा मागेका थिए।
अर्को पक्षले क्षमा दिएपछि मुद्दामामिला बिना नै विवाद मिलापत्रमा टुंगिएको जिल्ला प्रहरी कार्यालय, बाँकेका डिएसपी तथा प्रहरी प्रवक्ता दीपक पातलीले बताए।
'मानवीय संवेदनशीलतालाई समेत ध्यानमा राखेर फोहोर फ्याँक्नेलाई अर्को पक्षले मुद्दा–मामिला नगरी क्षमादान गरेका हुन्,' उनले भने।
उनका अनुसार क्षमादानपछि विवादका पक्ष र विपक्षबीच कुनै पनि कानुनी कारबाहीका लागि थप प्रक्रिया अगाडि नबढाउने सहमति पनि भएको छ।
त्यस्तै, सामाजिक सदभाव खल्बल्याउने गरी भ्रमात्मक सूचना तथा समाचार प्रकाशन र प्रसारण नगर्न प्रहरीले सबैमा आग्रह गरेको छ।
-1746009348.jpg)
