बर्दियाको गेरूवा गाउँपालिका–५ झबहीकी १० वर्षीया भारती (एन्जल) देउवाको हत्या आरोपी युवकलाई प्रहरीले सार्वजनिक गरेको छ।
जिल्ला प्रहरी कार्यालयमा पत्रकार सम्मेलन गरी बुधबार बेलुका गेरूवा– ५ कै २१ वर्षीय समिर सुनारलाई सार्वजनिक गरिएको हो। जिल्ला प्रहरी प्रमुख एसपी सरोज पौडेलले धन (सुन) को लालचकै कारण निर्दोष बालिकाको हत्या समिरले गरेको बताए।
आफन्तको बिहे घरबाट एक्लै साइकल चढेर नयाँ कपडा लगाउन भनेर मामा घरतर्फ जाँदै गरेकी एन्जलले दुई कानमा एक/एक आनाको सुनको मुन्द्री लगाएकी थिइन्। उनको घाँटीमा दुई तोलाको चाँदीको सिक्री पनि थियो। गरगहनाको लालचले समिर एक्लैले एन्जलको हत्या गरेको एसपी पौडेलले बताए।
‘माछा मार्न खोलामा बसेको समिरले एकलास ठाउँमा एक्लै साइकलमा आइरहेकी एन्जलले लगाएको गहना देख्नासाथ धम्काएर कानका मुन्द्री बलजफती निकाल्न थालेछ,’ एसपी पौडेलले भने, ‘तर, एन्जल चिच्याउँदै प्रहरीलाई र समाजमा भनिदिन्छु भन्छिन्, त्यतिखेर समिरले बालिकाको आवाज बन्द गर्न हत्केलाले मुख थुन्छ र त्यही क्रममा उसले घाँटी अठ्याएर एन्जलको हत्या गरेको स्वीकार गरेको छ।’
हत्यापछि समिरले एन्जलले प्रयोग गरेको साइकल पानीमा, चप्पल झाडीमा फालेर लास पनि नजिकै गेरूवा–५ मूलपानी गुडिखोला किनारमा बालुवामा गाडी दिएका हुन्छन्।
समिरले एन्जलबाट लुटेका सुनका दुई आना मुन्द्री र दुई तोलाको चाँदीको सिक्री बर्दियामै विभिन्न सुन पसलमा बिक्री गर्न गएका थिए। तर, सुन पसल सञ्चालन गर्दै आएका सबैले बिल मागेपछि र बिल बिनाको गहना नकिन्ने भन्दै फर्काइदिएको अनुसन्धानबाट खुलेको एसपी पौडेलले बताए।
‘ऊ लुटेका सुन र चाँदीका गहना बेचेर जति हुन्छ छिटो इण्डिया भाग्न खोजेको देखिन्छ,’ एसपी पौडेलले भने, ‘इण्डिया जाने भाडा समेत नभएको तथा मोबाइलमा रिचार्ज गर्ने पैसा समेत नभए यो बीचमा आफ्नी सासूलाई एक सय रुपैयाँ रिचार्ज गर्न लगाएको खुल्छ।’
उनी वर्षायाम लागेपछि मात्रै छिमेकी देश भारतबाट घर फर्किएका थिए। उनले भारतमा स्काभेटरको हेल्परको रूपमा काम गर्ने गरेको प्रहरी अनुसन्धानबाट खुलेको छ।
यी पनि:
-1746009348.jpg)
