यसपालि इलामको हिमाली गाउँमा ४२ वर्षपछि भीषण वर्षा भएको छ।
त्यस्तै चार वटा वर्षा मापन केन्द्रमा रेकर्ड–ब्रेक वर्षा भएको राष्ट्रिय विपद जोखिम न्यूनीकरण तथा व्यवस्थापन प्राधिकरणले जनाएको छ।
मंगलबार पत्रकार सम्मेलन गर्दै प्राधिकरणका कार्यकारी प्रमुख दिनेश भट्टले इलामका दुई र मधेसका दुई गरी चार वटा केन्द्रमा बढी पानी परेको रेकर्ड भएको जानकारी दिए।
यही कारण पनि इलाममा मानवीय र भौतिक क्षति बढी भएको उनले बताए।
असोज १७ देखि २० गतेसम्मको अविरल वर्षापछि पहिरोमा परी इलाममा ३७ जनाको मृत्यु भएको थियो। पाँचथर र काभ्रेमा १–१ जनाको मृत्यु भएको थियो।
त्यस्तै बाढीबाट उदयपुर, इलाम, धनुषा, पाँचथर, खोटाङमा गरी १० जनाको मृत्यु भएको थियो। चट्याङबाट दुई जनाको मृत्यु भएको थियो।
बाढीमा परी पाँच जना बेपत्ता भएका छन्। यसमध्ये चार जना लाङटाङ पदयात्रामा गएकाहरूलाई बेरिङ खोलाले बेपत्ता बनाएको हो। बाढीबाट भोजपुरमा एक जना बेपत्ता छन्। पहिरोबाट इलाममा एक जना बेपत्ता छन्।
असोज १७ देखि २० गतेसम्मको बाढीपहिरोमा ४७ जना घाइते भएका छन्।
पूर्वसूचना, प्रतिकार्यका बाबजुद यति धेरै मानवीय र भौतिक क्षति हुनुको कारण रेकर्ड–ब्रेक वर्षा भएको कार्यकारी प्रमुख भट्टले बताए।
उनका अनुसार इलामको हिमाली गाउँ केन्द्रमा २४ घन्टाको अवधिमा ३३२.६ मिलिमिटर पानी परेको थियो। त्यहाँ २०४० असार ३१ गते ३२०.६ मिलिमिटर पानी परेको थियो।
गौर केन्द्रमा पनि रेकर्ड–ब्रेक वर्षा भएको थियो। त्यहाँ असार १८ देखि १९ गतेको अवधिमा ३१५ मिलिमिटर वर्षा भएको थियो। गौर केन्द्रमा यसअघि २०६९ भदौ २८ गते ३०१.५ मिलिमिटर वर्षा मापन भएको थियो।
त्यस्तै पर्साको वीरगन्जमा पनि यसअघि परेको पानीको रेकर्ड तोडिएको थियो।
भट्टका अनुसार त्यहाँ असोज १७ देखि १८ को २४ घन्टाको अवधिमा २९४.५ मिलिमिटर वर्षा भएको थियो। वीरगन्जमा यसअघि २०४४ असोज १५ गते २८२.८ मिलिमिटर वर्षा मापन भएको थियो।
इलामकै टि–इस्टेटमा पनि रेकर्ड–ब्रेक वर्षा भएको थियो। त्यहाँ २४ घन्टामा यस पटक २८०.२ मिलिमिटर वर्षा मापन भयो। इलाम टि–इस्टेटमा यसअघि २०५४ असार २४ गते २७३.२ मिलिमिटर वर्षा मापन भएको थियो।
यसपालि अधिकतम वर्षा रौतहटको महेशपुरमा भएको थियो। महेशपुरमा असोज १७ देखि १८ को २४ घन्टाको अवधिमा ३५८ मिलिमिटर वर्षा भएको प्राधिकरणले जानकारी दिएको छ।
'इलाममा बढी क्षति हुनुको कारण पानी पनि बढी परेर हो,' कार्यकारी प्रमुख भट्टले भने।
-1746009348.jpg)
