पाँच दिनको अन्तरालमा तुलसीपुर कारागारबाट भागेका ६ जना कैदीबन्दी पक्राउ परेका छन्।
जेनजी आन्दोलनको क्रममा भदौ २४ गते जेल तोडेर भागेकामध्ये ६ जना असोज १७ गतेयता पक्राउ परेका हुन्।
कर्तव्य ज्यान मुद्दामा १५ वर्ष कैद सजाय तोकिएका राप्ती गाउँपालिका–८ पिपरीका बुधराम चौधरी असोज १७ गते पक्राउ परेका थिए।
जिप्रका दाङका प्रवक्ता डिएसपी चक्रबहादुर शाहका अनुसार घोराही उपमहानगरपालिका–१३ मौलाका नारायण घर्ती मगर असोज १९ गते पक्राउ परेका हुन्। बलात्कार मुद्दामा ७ वर्ष कैद सजाय तोकिएको छ।
त्यस्तै, बलात्कार मुद्दामै १८ वर्ष कैद सजाय तोकिएका गडवा गाउँपालिका–१ का सुनिल नेपाली असोज २० गते पक्राउ परेका थिए।
बलात्कार मुद्दामै १२ वर्ष कैद सजाय तोकिएका घोराही–५ का बसन्त सार्की असोज २० गते, सोही मुद्दामा ८ वर्ष कैद सजाय तोकिएका घोराही–१७ का मनोज चौधरी असोज २१ गते र १४ वर्ष कैद सजाय तोकिएका सल्यानको कालिमाटी गाउँपालिका–७ का जीवन भन्ने जिउपाल दमाई असोज २० गते विभिन्न स्थानबाट पक्राउ परेको जिल्ला प्रहरी प्रवक्ता शाहले जानकारी दिएका छन्।
भदौ २४ गते जेनजी आन्दोलनको क्रममा फाइदा उठाउँदै तुलसीपुर कारागारबाट ४४६ कैदीबन्दीमध्ये २५४ जना भागेका थिए। तीमध्ये हालसम्म १५४ जना पक्राउ परेका छन्। कतिपय भने आफै सम्पर्कमा आएको कारागार स्रोतले बताएको छ।
दाङभन्दा बाहिर जिल्लामा पक्राउ परेका १८ जनालाई सम्बन्धित जिल्लाकै कारागारमा राखिएको छ।
८२ जना कैदी अझै फरार रहेको तुलसीपुर कारागारका प्रमुख गिरबहादुर सेजवालले जानकारी दिए।
-1746009348.jpg)
