काठमाडौंबाट लुटेको प्रहरी पेस्तोलसहित कैलालीका एक युवक पक्राउ परेका छन्।
घोडाघोडी नगरपालिका– १ का २३ वर्षीय आकाश शाही प्रहरीले प्रयोग गर्ने टाइप – ५४ लेखिएको चाइनिज पेस्तोलसहित पक्राउ परेका हुन्।
इलाका प्रहरी कार्यालय सुख्खडका प्रहरी प्रमुख डिएसपी रमेशदत्त अवस्थीका अनुसार पक्राउ पर्दा शाही लागुऔषध प्रयोग गरेका कारण नशामा लठ्ठिएको अवस्थामा फेला परेका थिए।
‘अझै उनी नशामै रहेका कारण राम्रोसँग सोधपुछ हुन सकेको छैन,’ डिएसपी अवस्थीले भने।
डिएसपी अवस्थीका अनुसार शाहीका विरूद्ध इप्रका सुख्खडमा विगतमा पनि लागुऔषध सम्बन्धी मुद्दा चलेको रेकर्ड छन्। उनी विरूद्ध मोटरसाइकल चोरी लगायतका मुद्दा पनि प्रहरीमा रहेको डिएसपी अवस्थीले बताए।
सोमबार राति आफ्नै गाउँका युवासँग शाहीले झगडा र हातपात गरेपछि पीडितले इप्रका सुख्खडमा शाहीका विरूद्ध उजुरी दिएका थिए। सोही उजुरीका आधारमा प्रहरीले मंगलबार घटनाबारे सोधपुछका लागि शाहीलाई नियन्त्रणमा लिएको थियो।
पक्राउ पर्दा उनी लागुऔषधमा लठ्ठ परेको अवस्था देखेपछि प्रहरीले थप अनुसन्धान अगाडि बढाएको थियो।
अनुसन्धान गर्दै जाने क्रममा प्रहरीले घरमा लागुऔषध लुकाएको हुन सक्ने आशंकामा खान तलासी गर्न गएको थियो। त्यही क्रममा भान्सा कोठाको पुरानो बिग्रिएको सोलारको पाताभित्र लुकाएको अवस्थामा प्रहरीले प्रयोग गर्ने पेस्तोल बरामद भएको डिएसपी अवस्थीले जानकारी दिए।
जेनजी आन्दोलनका क्रममा भदौ २४ गते कोटेश्वर क्षेत्रबाट उक्त पेस्तोल प्रहरीबाट खोसेको प्रारम्भिक अनुसन्धानबाट खुलेको छ।
‘मैले होइन अर्कै साथीले जेनजी आन्दोलनका क्रममा प्रहरीबाट खोसेको पेस्तोल मलाई दिएको थियो भन्ने बयान शाहीले गरेका छन्,’ डिएसपी अवस्थीले भने, ‘शाही अझै लागुऔषधमा प्रभावमा रहेका कारण सामान्य अवस्थामा पुगेपछि थप सोधपुछ हुनेछ।’
-1746009348.jpg)
