यस वर्षको दसैं अवधिको दुई सातामा लुम्बिनी प्रदेशमा ५३६ वटा सवारी दुर्घटना भएका छन्। प्रहरीका अनुसार असोज ६ गते दसैंको घटस्थापनाको दिनदेखि १९ गतेसम्म भएका सवारी दुर्घटनामा २२ जनाको मृत्यु भएको छ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलका अनुसार लुम्बिनी प्रदेशका १२ जिल्लामा ५३६ सवारी दुर्घटना हुँदा २२ जनाको मृत्यु भएको हो। मृत्यु हुनेमा १२ जना पुरुष, ७ जना महिला र ३ जना बालबालिका ३ जना छन्।
ती दुर्घटनामा परी ७३५ जना घाइते भएका छन्। तीमध्ये १४८ जना गम्भीर घाइते भएका छन् भने ५८७ जना साधारण घाइते भएका छन्। घाइते हुनेमा पुरूषको सङ्ख्या ४७० छ। त्यस्तै ८० जना महिला र ९६ जना बालबालिका घाइते भएका छन्।
कार्यालयका सूचना अधिकारी प्रहरी नायब उपरीक्षक दीपेश बस्यालले यस वर्षको दसैंमा पहाडी जिल्लाको तुलनामा तराईका जिल्लाहरूमा सवारी दुर्घटनाका घटना धेरै भएको बताए। सबभन्दा बढी रूपन्देहीमा १३५ वटा सवारी दुर्घटनामा ७ जनाको मृत्यु तथा १३९ जना घाइते भएका छन्।
पश्चिम नवलपरासीमा भएका ५० वटा दुर्घटनामा ५९ जना घाइते भएका छन् भने कपिलवस्तुमा ४४ वटा दुर्घटनामा ३ जनाको मृत्यु तथा ८९ जना घाइते भएका छन्।
पाल्पामा २३ वटा दुर्घटनामा २ जनाको मृत्यु ४१ जना घाइते, गुल्मीमा १९ सवारी दुर्घटनामा २६ जना घाइते, अर्घाखाँचीमा १० वटा सवारी दुर्घटना हुँदा २ जनाको मृत्यु तथा ३२ जना घाइते भएका छन् भने दाङमा ५० वटा सवारी दुर्घटना हुँदा १ जनाको मृत्यु तथा ५६ जना घाइते भएका छन्।
ट्राफिक प्रहरीका अनुसार बाँकेमा ९९ वटा सवारी दुर्घटनामा ४ जनाको मृत्यु तथा १५६ जना घाइते भएका छन्।
बर्दियामा ९३ सवारी दुर्घटना हुँदा ३ जनाको मृत्यु तथा १०८ जना घाइते, प्युठानमा १३ वटा सवारी दुर्घटनामा १५ जना घाइते भएका छन्।
रोल्पामा ७ वटा सवारी दुर्घटना हुँदा १३ जना तथा पूर्वी रुकुममा एउटा सवारी दुर्घटनामा दुई जना घाइते भएको ट्राफिक प्रहरीले जनाएको छ।
-1746009348.jpg)
