पृथ्वी राजमार्गको सलाङघाटमा ठूलो पहिरो खसेको छ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बागमती प्रदेशका एसपी डिल्ली पाण्डेका अनुसार उक्त पहिरो हटाउने काम अहिले चलिरहेको छ।
बेनीघाट-रोराङ गाउँपालिका-९ मा पर्ने सलाङघाटमा निकै ठूलो पहिरो खसेको उनले बताए। त्यसलाई पन्छाउन ४ घण्टाजति लाग्न सक्ने अनुमान गरिएको छ।
एसपी पाण्डेका अनुसार अहिले नारायणघाट-मुग्लिन सडकमा कुनै समस्या छैन। राति तुइन र कालीखोलामा खसेको पहिरो पन्छाएपछि उक्त सडकबाट पोखरातर्फ जाने सवारी साधनहरु चल्न थालेका छन्। काठमाडौंतर्फ जान खोज्ने सवारी साधनलाई चितवनका विभिन्न स्थानमा होल्ड गरिएको छ।
‘अहिसम्म पृथ्वी राजमार्गमा ठूलो समस्या सलाङघाटमा मात्रै हो। अन्यत्र कतै एकतर्फी चाहि छ,’ एसपी पाण्डेले भने, ‘पहिरो पन्छाएपछि अति आवश्यक अवस्थाका सवारी साधन चल्न सक्छन्।’
राष्ट्रिय विपद जोखिम न्यूनीकरण तथा व्यवस्थापन प्राधिकरण र जिल्ला प्रशासन कार्यालयले सवारी साधनको आवतजावत बन्द गर्ने सूचना जारी गरेकाले पहिरो पूर्णरुपमा पन्छाएपनि सबै सवारी साधनहरुलाई छाड्न नसकिने उनले बताए। प्राधिकरणले काठमाडौं उपत्यका भित्रिने र बाहिरिने सवारी साधनहरुको आवातजावत असोज १८, १९ र २० गतेका लागि बन्द गर्ने निर्णय गरेको थियो।
‘अहिलेको पहिरो हटाएपनि फेरि जुनसुकै ठाउँमा पहिरो खस्न सक्छ। मौसम पूर्वानुमान महाशाखाको सूचनाको आधारमा मात्रै नयाँ निर्णय आउला,’ एसपी पाण्डेले भने, ‘पहिरो पन्छाए पनि काठमाडौंतर्फ तत्काल सार्वजनिक सवारी साधनहरु सञ्चालनमा आउने सम्भावना छैन।’
-1746009348.jpg)
