ललितपुरमा विपदमा परी उद्धारमा खटिन राफ्टिङ तथा पर्वतारोहणका उद्धारकर्मी पनि प्रहरीसँगै तैनाथ रहेका छन्।
भारी वर्षाका कारण काठमाडौं उपत्यकासहित देशका विभिन्न नदीमा बहाव बढेको छ। यसबीच ललितपुरका नदी किनार पनि उच्च जोखिम रहेको क्षेत्र हो।
त्यसलाई न्यूनीकरण गर्न प्रहरीले नेपाल एसोसिएसन अफ राफ्टिङ एजेन्सी र नेपाल पर्वतारोहण संघको सहयोग लिएको छ।
'राफ्टिङ र पर्वातारोहणका विशेष उद्धारकर्मीहरू २५ जनाजति हामीसँगै प्रहरी कार्यालयमा हुनुहुन्छ,' जिल्ला प्रहरी परिसर ललितपुरका एसएसपी होबिन्द्र बोगटीले भने।
'एउटा एम्बुलेन्स, रेस्क्यू बोट र हेभी इक्युपमेन्ट सहितको टोली यहीँ छन्। पाँच-पाँच जना गरी १० वटा टिम बनाएका छौं,' उनले भने, 'उनीहरू कुनै पनि बेला उद्धारका लागि तत्काल जाने गरी मिलाइएको छ। अनुभवी टोली हुँदा हामीमा अलिकति कन्फिडेन्स छ।'
ललितपुरका केही क्षेत्रमा बिजुली तथा टेलिफोनमा समेत समस्या देखिएको उनले बताए।
'फुल्चोकी क्षेत्रमा रूख ढलेर केही समस्या आएको छ,' उनले भने।
-1746009348.jpg)
