काठमाडौं उपत्यकासहित बागमती, मधेस, गण्डकी र लुम्बिनी प्रदेशमा अहिले अविरल वर्षा भइरहेको छ।
काठमाडौंमा त शुक्रबार रातिदेखि नै अविरल वर्षा भइरहेको छ। काठमाडौंमा अहिले मध्यम वर्षा छ। बंगालको खाडीबाट भित्रिएको जलवाष्पयुक्त मनसुनी वायुले अहिले काठमाडौंसहित पाँच प्रदेशमा मध्यम वर्षा गराइरहेको हो।
जल तथा मौसम विज्ञान विभागका अनुसार काठमाडौंको नैकापमा पछिल्लो एक घन्टामा ६.८, ललितपुरको टीकाथलीमा ५.८, काठमाडौंको पानीपोखरीमा ५.२, कपनमा ५.२, भक्तपुरको ताथलीमा ५.८ मिलिमिटर वर्षा भएको छ।
पछिल्लो २४ घन्टामा कैलालीको गर्भ दरबारमा ८५.८ मिलिमिटर वर्षा भएको छ।
हामीले मौसमविद् प्रतिभा मानन्धरलाई काठमाडौंमा कति पानी पर्ने सम्भावना छ भनेर सोधेका थियौं। उनले यसपटक भित्रिएको पानी पार्ने प्रणालीको केन्द्र नै काठमाडौंजस्तो देखिएको उनले बताइन्। अहिले भारत हुँदै लुम्बिनी, गण्डकी प्रदेशतिरबाट पानी पार्ने बादल काठमाडौंको आकाशमा केन्द्रित भइरहेको उनले बताइन्।
‘यसपालिको बादलको केन्द्र नै काठमाडौं देखिएको छ। लुम्बिनी, गण्डकी प्रदेशको भू–भागबाट पनि पानी पार्ने प्रणाली यता आइरहेको देखिन्छ,’ उनले भनिन्।
उनका अनुसार काठमाडौं शनिबार दिनभरि नै पानी पर्ने सम्भावना छ। अहिले मध्यम वर्षा भइरहेको छ। यो क्रम केही बेर रोकिए पनि पुनः पानी पर्न सुरू हुने उनले बताइन्।
काठमाडौंमा अति भारी वर्षा भने प्रक्षेपण नगरिएको उनले बताइन्। मौसम विज्ञानको भाषामा २४ घन्टामा २०० मिलिमिटरभन्दा बढी पानी परेमा अति भारी वर्षा भनिन्छ।
१०० मिलिमिटरदेखि दुई सय मिलिमिटरसम्मको वर्षालाई धेरै भारी वर्षा भन्ने गरिन्छ।
गत वर्षको असोज १० देखि १३ गतेसम्म काठमाडौं उपत्यकाका ११ स्थानमा रेकर्डब्रेक वर्षा भएको थियो। त्यतिबेला काठमाडौंको त्रिभुवन विमानस्थल केन्द्रमा २४ घन्टाको अवधिमा २३९.७ मिलिमिटर वर्षा भएको थियो।
मौसम विज्ञानले शनिबार दिउँसो देशभर साधारणतया बदली रहने बताएको छ।
विभागले कोशी, मधेस, बागमती, गण्डकी र लुम्बिनी प्रदेशका पहाडी र तराई भू–भाग धेरै स्थानहरूमा तथा बाँकी प्रदेशका पहाडी र तराई भू–भागका केही स्थानहरूमा मेघगर्जन/चट्याङसहित मध्यम वर्षाको सम्भावना रहेको बताएको छ।
कोशी, मधेस, बागमती र गण्डकीका पहाडी र तराई भू–भागका थोरै स्थानहरूमा तथा लुम्बिनी प्रदेशका तराई भू–भागका एक–दुई स्थानमा भारी वर्षाको पनि सम्भावना छ। मधेस, बागमती र गण्डकी प्रदेशका पहाडी र तराई भू–भागका एक–दुई स्थानमा धेरै भारी वर्षाको समेत सम्भावना रहेको विभागको भनाइ छ।
शनिबार राति कोशी, मधेस, बागमती र गण्डकी प्रदेशमा अधिकांश बदली रही बाँकी प्रदेशमा साधारणतया बदली रहने छ।
कोशी, मधेस, बागमती र गण्डकी प्रदेशका पहाडी र तराई भू–भागका अधिकांश स्थानहरूमा, लुम्बिनी प्रदेशका पहाडी र तराई भू–भाग धेरै स्थानहरूमा तथा बाँकी प्रदेशका केही स्थानहरूमा मेघगर्जन/चट्याङसहित मध्यम वर्षाको सम्भावना रहेको बताएको छ।
त्यस्तै कोशी, मधेस, बागमती र गण्डकी प्रदेशका पहाडी र तराई भू–भागका केही स्थानहरूमा तथा मधेस प्रदेश लगायत लुम्बिनी प्रदेशका तराई भू–भागका एक–दुई स्थानमा भारीदेखि धेरै भारी वर्षाको सम्भावना रहेको विभागले बताएको छ।
-1746009348.jpg)
