वीरगन्जमा कुटपिटबाट एक युवकको मृत्यु भएको छ।
प्रहरीका अनुसार मंगलबार राति भएको कुटपिटबाट २४ वर्षीय शिवम साह कानु (गोल्डेन) को मृत्यु भएको हो।
शिवम वीरगन्ज महानगरपालिका– १० मा डेरा गरी बस्दै आएका थिए। बाराको परवानीपुर गाउँपालिका–५ बहुअरी घर भएका शिवम वीरगन्जमा ई–रिक्सा चलाउँदै आएका थिए।
माईस्थानबाट गीता मन्दिर जाने बाटोमा मंगलबार राति ११.४५ बजेतिर मेलामा घुमिरहेका युवाहरूबीच विवाद भई कुटाकुट भएको थियो।
त्यस क्रममा शिवमको शरीरमा बाँसले प्रहार गरिएको थियो। बाँसले लागेर गम्भीर घाइते भएका उनलाई उपचारका लागि नारायणी अस्पतालमा लैजाँदै गर्दा बाटोमै मृत्यु भएको प्रहरीले जनाएको छ।
घटनाबारे अनुसन्धानका लागि १० जनालाई पक्राउ गरिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए।
'एकै उमेर समूहका युवकहरूबीच झगडा हुँदा कुटपिटबाट शिवमको मृत्यु भएको छ। घटनाबारे अनुसन्धानका लागि १० जनालाई पक्राउ गरेका छौं,' उनले भने।
उनीहरूले मादक पदार्थ सेवन गरेर झगडा गरेको आशंकामा प्रहरीले अनुसन्धान अगाडि बढाएको छ।
-1746009348.jpg)
