अमेरिकाले एच-१बी भिसामा कडाइ गरेपछि विदेशी प्राविधिक प्रतिभालाई आकर्षित गर्न चीनले यसै हप्तादेखि नयाँ भिसा कार्यक्रम सुरू गर्दैछ।
एच-१बी भिसामा कर्मचारी ल्याउने रोजगारदाता कम्पनीले अमेरिकी सरकारलाई १ लाख अमेरिकी डलर शुल्क तिर्नुपर्ने नियम हालै अमेरिकी राष्ट्रपति डोनाल्ड ट्रम्पले लगाएका छन्।
अमेरिकाले विज्ञान, प्रविधि लगायत क्षेत्रका दक्ष विदेशी जनशक्ति भित्र्याउन एच–१बी भिसा प्रयोग गर्छ। ट्रम्पले सो भिसामा कडाइ गरेपछि संसारभरिका दक्ष जनशक्तिलाई अमेरिका जान मुस्किल हुनेछ। ती जनशक्तिलाई आकर्षित गर्न चीनले नयाँ ‘के’ भिसा ल्याएको हो।
सो कार्यक्रमले अमेरिकासँगको भू-राजनीतिक प्रतिस्पर्धामा चीनलाई मद्दत गर्ने अपेक्षा गरिएको भनेर समाचार संस्था रोयटर्सले लेखेको छ।
उसो त संसारमा सबैभन्दा धेरै इन्जिनियर उत्पादन गर्ने चीनलाई दक्ष इन्जिनियरहरूको कमी छैन। तर अमेरिकाले विदेशका दक्ष जनशक्तिलाई पनि प्रवेश गर्न अप्ठ्यारो पारेको बेला चीनले आफूलाई विदेशी लगानी र प्रतिभा दुवैलाई स्वागत गर्ने देशको रूपमा देखाउन यो कदम चालेको हो।
पछिल्लो समय चीनले विदेशी लगानी र यात्रुलाई आकर्षित गर्न विभिन्न उपायहरू अपनाएको छ। विदेशी लगानीकर्ताहरूका लागि थप क्षेत्रहरू खुला गरेको छ भने अधिकांश युरोपेली देश, जापान र दक्षिण कोरिया लगायत देशका नागरिकहरूलाई भिसा छुटको सुविधा दिएको छ।
‘यसको सांकेतिक अर्थ शक्तिशाली छ: जब अमेरिकाले बाधा खडा गरिरहेको छ, चीनले घटाइरहेको छ,’ अमेरिकाको आयोवा राज्यका अध्यागमन वकिल म्याट माउन्टेल-मेडिसीले रोयटर्ससँग भने।
अगस्टमा घोषणा गरिएको के भिसाले विदेशबाट युवा विज्ञान, प्रविधि, इन्जिनियरिङ र गणितका (स्टेम) युवा स्नातकहरूलाई लक्षित गरेको छ। यसले रोजगारदाताबाट कामको प्रस्ताव नभए पनि प्रवेश, बसोबास र रोजगारीको अनुमति दिने वाचा गरेको छ। अमेरिकी रोजगारीको विकल्प खोजिरहेका दक्ष विदेशी कामदारहरूका लागि यो आकर्षक हुन सक्ने रोयटर्सले जनाएको छ।
ट्रम्पले यसै महिना एच-१बी भिसा अन्तर्गत दक्ष विदेशी कामदार भित्र्याउन प्राविधिक कम्पनीहरूले अमेरिकी सरकारलाई १ लाख अमेरिकी डलर शुल्क तिर्नुपर्ने नियम घोषणा गरेका थिए।
विश्वका सबैभन्दा धनी व्यक्ति इलन मस्क देखि लिएर केही ठूला प्रविधि कम्पनीका प्रमुख कार्यकारी अधिकृतहरूले समेत सुरूमा एच-१बी भिसामै अमेरिकामा काम गरेका थिए। विश्वका यस्ता उत्कृष्ट प्रतिभाहरूलाई आकर्षित गर्ने एच-१बी भिसामा कडाइ गरेर अमेरिकाले आफ्नै खुट्टामा बन्चरो हानेको टिप्पणी कतिपय विश्लेषकले गरेका छन्।
यस्तो बेलामा ती दक्ष जनशक्तिलाई आकर्षित गर्न चीनले के भिसा सुरु गरेको हो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
