जेन–जी प्रदर्शनको क्रममा कोही आफन्त, साथीसंगी हराइरहेको भए सम्पर्कमा आउन काठमाडौं प्रहरीले अनुरोध गरेको छ।
आगलागी भएका स्थानमा मानव अस्थिपञ्जरहरू फेला परेको भन्दै प्रहरीले सम्पर्कमा आउन भनेको हो।
भदौ २३ र २४ गते काठमाडौंसहित देशभरि प्रदर्शनको क्रममा कतिपय मानिसहरू सम्पर्कबिहीन भएका छन्। भौतिक संरचनामा तोडफोड र आगजनी हुँदा धेरैको शव नचिनिने अवस्थामा फेला परेका छन्।
यसबीच देशका विभिन्न भाटभटेनी सुपरमार्केटमा चिन्न नसकिने अवस्थाका मानव अस्थिपञ्जरहरू फेला परेका छन्।
जिल्ला प्रहरी परिसर काठमाडौंका एसपी अपिलराज बोहराका अनुसार काठमाडौंको चुच्चेपाटीमा रहेको भाटभटेनीमा मात्रै ६ वटा जलेका शवका अस्थिपञ्जिर भेटिएको छ।
'अस्थिपञ्जिरहरू फेला परेकाले कोही चिनेका मानिस हराएका छन् भने आफन्त तथा परिवारहरू सम्पर्कमा आउन अनुरोध छ,' उनले भने।
भदौ २३ र २४ गते भएको प्रदर्शनको क्रममा ज्यान गुमाउनेको संख्या ७२ पुगेको छ।
५९ जना प्रदर्शनकारी, १० जना कैदीबन्दी र तीन जना प्रहरी छन्। कतिपयको पहिचान भइसकेको छ भने कतिपयको पहिचान खुल्न सकेको छैन।
-1746009348.jpg)
