कैलालीमा पछिल्लो ६ घन्टामा धेरै भारी वर्षा भएको छ।
जल तथा मौसम पूर्वानुमान महाशाखाले अद्यावधिक गरेको विवरण अनुसार पछिल्लो ६ घन्टामा कैलालीको चिसापानी मापन केन्द्रमा १०७.४ मिलिमिटर पानी परेको छ।
बिहीबार बिहानैदेखि देशका अधिकांश भूभागमा वर्षा भइरहेको छ।
पछिल्लो ६ घन्टामा कैलालीकै साढेपानीमा ६८ मिलिमिटर, कञ्चनपुरको शान्तिपुर बेलौरीमा ४६.८ मिलिमिटर, चितवनको कालीखोलामा ४७ मिलिमिटर वर्षा भएको छ।
चौबीस घन्टाको अवधिमा चार ठाउँमा धेरै भारी वर्षा भएको छ।
झापाको शनिश्चरेमा १०४.२ मिलिमिटर, काठमाडौंको बूढानीलकण्ठमा १२७.८ मिलिमिटर, लमजुङको गिलिङमा १०२.६ मिलिमिटर, कैलालीको चिसापानीमा १०९ मिलिमिटर वर्षा चौबीस घन्टामा मापन भएको छ।
मौसमको शब्दावलीमा १० मिलिमिटरसम्मको वर्षालाई हल्का, १०-५० मिलिमिटरसम्मको वर्षालाई मध्यम, ५०-१०० मिलिमिटरसम्मको वर्षालाई भारी, १०० देखि २०० मिलिमिटरसम्मको वर्षालाई धेरै भारी र २०० मिलिमिटरभन्दा बढी पानी पर्यो भने अति भारी वर्षा भनिन्छ।
हाल मनसुनको न्यूनचापीय रेखा सरदर स्थानको आसपासमा अवस्थित रहेको छ। बंगालको खाडीबाट मनसुनी हावाको प्रभाव केही बढेको महाशाखाले जनाएको छ।
बिहीबार दिउँसो बाग्मती प्रदेश, गण्डकी प्रदेश, लुम्बिनी प्रदेश र सुदुरपश्चिम प्रदेश लगायत देशका पहाडी भू-भागमा साधारणतया बदली रही बाँकी भू-भागमा आंशिक बदली रहनेछ।
बाग्मती प्रदेश, गण्डकी प्रदेश, लुम्बिनी प्रदेश र सुदुरपश्चिम प्रदेश लगायत देशका पहाडी भू-भागका केही स्थानहरूमा तथा बाँकी भु-भागका थोरै स्थानहरूमा मध्यम वर्षाको सम्भावना रहेको महाशाखाले जनाएको छ।
लुम्बिनी प्रदेशको तराइ साथै सुदूरपश्चिम प्रदेश र कर्णाली प्रदेशको पहाडी भू-भागका एक-दुई स्थानमा दिउँसो भारी वर्षाको सम्भावना रहेको छ।
बिहीबा राति देशभर साधारणतया बदली रहनेछ ।
राति देशका पहाडी भू-भागका धेरै स्थानहरू र बाँकी भू-भागका थोरै स्थानहरूमा मध्यम वर्षाको सम्भावना रहेको छ।
गण्डकी प्रदेश,कर्णाली प्रदेश र सुदुरपश्चिम प्रदेशको पहाडी भू-भाग साथै लुम्बिनी प्रदेश र कोशी प्रदेशका तराइका भू-भागका एक-दुई स्थानमा राति पनि भारी वर्षाको सम्भावना रहेको छ ।
-1746009348.jpg)
