पाँचथरको इवा खोलामा पाहा मार्न जाने क्रममा अचानक आएको बाढीले रातभर बगरमा अड्किएका चार जनाको बुधबार सकुशल उद्धार भएको छ।
पाँचथर याङवरक गाउँपालिका–२ स्थित इवा खोलामा अचानक बाढी आउँदा मंगलबार साँझतिर पाहा मार्न गएका फिदिम नगरपालिका–४ का १९ वर्षीय प्रतिक तामाङ, २३ वर्षीय झल्ला सम्बाहाम्फे, २८ वर्षीय शेरबहादुर मगर र ताप्लेजुङको सिदिङवा गाउँपालिका–५ का २२ वर्षीय सन्तोष पन्धाक इवा खोलाको बगरमा अडकिएका थिए।
लगत्तै प्रहरी चौकी फलैचा, इलाका प्रहरी कार्यालय च्याङथापु र अमरपुरबाट खटिएको टोली उद्धारका लागि पुगेको थियो। तर पानी परिरहेको र खोलामा भेल बढिरहेको कारण तत्काल उद्धार गर्न कठिनाइ भएको प्रहरीले जनाएको छ। त्यस क्रममा रातभर बस्नका लागि प्रहरीले चाउचाउ र लाइटरलाई ढुंगामा पोको पारेर फ्याँकेर उनीहरूसम्म पुर्याएको थियो।
ठूलो ढुंगाको ओतमा रात बिताएका चारै जनालाई बुधबार बिहान स्थानीयको सहयोगमा बाँसको पुल बनाएर सकुशल उद्धार गरिएको कोशी प्रदेश प्रहरीले जानकारी दिएको छ।
-1746009348.jpg)
