ज्यान मार्ने उद्योग कसुरमा चक्रे मिलन भनिने मिलन गुरूङको मुद्दा जिल्ला अदालत भक्तपुरका न्यायाधीश रामप्रसाद न्यौपानेको इजलासमा परेको छ।
शुक्रबार न्यायाधीश न्यौपानेको इजलासमा चक्रे मिलनको थुनछेक हुने भएको हो। अहिले उनको बयान भइरहेको छ।
सरकारी वकिलको कार्यालय भक्तपुरले ज्यान मार्ने उद्योग कसुरमा उनीविरूद्ध अदालतमा मुद्दा दायर गरेको थियो।
उनीमाथि भक्तपुरमा मनिष रायमाझी भन्ने व्यक्तिमाथि खुकुरी प्रहार गर्न लगाएको आरोप छ।
सरकारी वकिलको कार्यालयमा चक्रे मिलनले भने मनिष रायमाझीलाई नचिन्ने बयान दिएका छन्।
‘मैले मनिषलाई चिन्दिनँ। उनलाई नचिनेपछि धम्की दिने र मेसेज पठाउने कुरै भएन। मैले अजित खवासलाई पनि चिनेकै छैन। मैले कोही कसैलाई नचिनेको अवस्थामा पूर्वयोजना बनाई ज्यान मार्ने उद्देश्यले कुटपिट गर्न लगाउने कुरै भएन,’ उनले बयानमा भनेका छन।
आफूमाथि पीडित भनिएका व्यक्तिले किन जाहेरी दिए भन्नेसमेत थाहा नभएको उनको भनाइ थियो।
शंकाकै भरमा आरोप लगाएको हुन सक्ने पनि चक्रे मिलनको बयानमा उल्लेख गरेका छन्।
‘उनले खुलाएका कुराहरू मैले थाहा नपाएको अवस्थामा उनलाई खोजी गर्ने, उनलाई कुटपिट गर्ने कुरै भएनर यो सबै उनले शंकाको भरमा लेखाएका होलान्,’ चक्रे मिलनले भनेका छन्।
मध्यपुर थिमि नगरपालिका-२ सानोठिमीको एक रेष्टुरेन्टमा २०८१ भदौ १० गते मनिष रायमाझीमाथि खुकुरी प्रहार भएको थियो।
खुकुरी प्रहार भएको घटनामा प्रहरीले सर्लाही घर भई ललितपुरको ग्वार्को बस्दै आएका २५ वर्षीय अजित खवासलाई पक्राउ गरेको थियो। उनले सफाइसमेत पाइसकेका छन्।
सरकारी वकिल कार्यालय भक्तपुरमा प्रतिवादी बनाइएका अजित खवासले बरू उल्टै घाइते भएका मनिषलाई प्रहरीकहाँ पुर्याइदिएको र त्यहाँबाट प्रहरीले अस्पताल पुर्याएको बयान दिएका थिए।
मनिषसँग भेट भएपछि ८/९ जनाको समूह आएर ‘तैं हैन’ भनेर कुटेको उनको भनाइ थियो। उक्त समूहले आफूलाई समेत कुटपिट गरेको उनले बताएका थिए।
यसरी घटना भएपछि उनले तीनकुनेको प्रहरी चौकीमा पुर्याएको र मनिषले ‘मामा मलाई चक्रेले पिट्यो’ भनेका थिए। पछि घाइते भएका मनिषलाई कान्तिपुर अस्पतालमा लगिएको थियो।
खुकुरी प्रहारबाट मनिषको दुबै कोखामा चोट लागेको थियो। टाउकोमा समेत निलडाम हुने गरी कुटपिट गरेको आरोप थियो।
चक्रे मिलनसहित १९ जनालाई काठमाडौं प्रहरीले साउन १५ गते मध्यराति महाराजगन्जबाट पक्राउ गरेको थियो। जन्मदिन मनाइरहँदा होहल्ला गरेको आरोपमा प्रहरीले उनीहरुलाई पक्राउ गरेको थियो।
जिल्ला अदालत काठमाडौंमा उनीहरूविरूद्ध अभद्र व्यवहारको मुद्दा दायर भएको थियो। उक्त मुद्दामा जिल्ला अदालतले चक्रे मिलनलाई ३० हजार रुपैयाँ धरौटीमा छाड्न आदेश दिएको थियो।
-1755241369.jpg)
-1746009348.jpg)
