नेपालबाट मानिसहरूलाई प्रलोभनमा पारेर भारत पुर्याएर मिर्गौला निकालिएको भन्दै ५ जना पीडितले प्रहरीमा उजुरी दिएका छन्।
सिन्धुलीबाट १, काभ्रेका २, नुवाकोट २ जना गरी ५ जनाले मंगलबार मानव बेचबिखन अनुसन्धान ब्युरोमा जाहेरी दिएका हुन्।
उनीहरूले आफूलाई प्रलोभनमा पारेर भारत पुर्याएर मिर्गौला निकालिएको भन्दै अहिले प्रहरीको नियन्त्रणमा रहेका तीन जनाविरूद्ध जाहेरी दिएका छन्।
साउन २१ गते सिन्धुली दुधौली नगरपालिका-१ का खिलबहादुर भुजेलले जाहेरी दिएपछि तीन जनालाई ब्युरोले पक्राउ गरेको थियो।
जसमा काभ्रे पाँचखाल नगरपालिका-१० का ३५ वर्षीय कुमार भन्ने राजकुमार परियार, नुवाकोट बेलकोटगढी नगरपालिका-९ का २४ वर्षीय समिर नेपाली र बेलकोटगढी नगरपालिका-४ का ४७ वर्षीय राकेश नेपाली छन्।
साथै अर्का एक व्यक्तिलाई पनि ब्युरोले नियन्त्रणमा लिएर अनुसन्धान गरिरहेको छ। उनी गिरोहमा संलग्न भएको भनिए पनि जाहेरीमा उनको नाम किटानी गरेर उजुरी नआएको ब्युरोका एसएसपी कृष्ण पंगेनीले जानकारी दिए। त्यसैले उनको नाम सार्वजनिक गरिएको छैन।
यस घटनामा गिरोह नै संलग्न भएको र धेरै व्यक्तिहरूलाई प्रलोभनमा पारेर भारत पुर्याइ मिर्गौला निकालिएको हुनसक्ने भएकाले पीडितलाई ब्युरोको सम्पर्कमा आउन आग्रह गरिएको छ।
एसएसपी कृष्णप्रसाद पंगेनीका अनुसार अहिले पक्राउ परेका गिरोहले ४/५ वर्षदेखि नेपालबाट प्रलोभनमा पारेर भारत पुर्याई मिर्गौला निकाल्ने गरेको प्रारम्भिक अनुसन्धानमा खुलेको छ।
यस घटनामा एक दुई जना मात्र नभई ठूलो संख्यामा अन्तरदेशीय व्यक्तिहरू जोडिएर सोझासिधा नेपालीको मिर्गौला बेचिएको पाइएको उनले बताए। यस घटनामा जोडिएका धेरैले मिर्गौला बेचेको अनुसन्धानमा देखिएको एसएसपी पंगेनीले जानकारी दिए।
'बेचेर फर्किएकाहरू नै यस अपराधमा जोडिँदै गएको देखिएको छ,' ब्युरोका एक अधिकारीले भने।
उनीहरूले टिम बनाएर काम गर्ने गरेको पाइएको छ।
'गिरोहका एक समूहको नेपालका विभिन्न ठाउँका मान्छेहरूलाई प्रलोभनमा पार्ने र भारत जान तयार बनाउने रहेछ। आर्थिक अवस्था कमजोर भएका, लागुपदार्थ, मदिरा सेवन गर्ने र बेरोजगारीहरूलाई छनोट गर्ने गरेको देखियो,' ती प्रहरीले भने, 'आफ्नै खर्चमा भारत पुर्याएर रोजगारी दिने प्रलोभन देखाएपछि यहाँ जागिर नपाएर भौंतारिएकाहरू गएको देखिन्छ।'
ती प्रहरीका अनुसार प्रलोभनमा परेका व्यक्तिहरू जाने पक्का भएपछि गिरोहको एउटा समूहले अर्को समूहको जिम्मा लगाउँथ्यो।
त्यो समूहले त्यस्ता व्यक्तिहरूलाई भारत पुर्याउँथ्यो। उनीहरूले आफ्नै खर्चमा सडकमार्ग हुँदै नाका पार गराउने गरेको अनुसन्धानमा खटिएका ती प्रहरीले बताए।
नाका पार गरिसकेपछि उनीहरूले भारतस्थित एक होटलमा कोठा भाडामा लिएर राख्ने गर्छन्। एउटा टिमले त्यहाँ नेपालबाट गएकाहरूलाई व्यवस्थापन गर्ने गरेको पक्राउ परेकाले प्रहरीलाई बताएका छन्।
उनका अनुसार त्यहाँ बस्नेहरूले विभिन्न अस्पतालमा सहकार्य गरेर मिर्गौला निकाल्न गरेको अनुसन्धानमा खुलेको छ।
पक्राउ परेकाहरूले यो काम ४/५ वर्षदेखि गर्दै आएको स्वीकार गरेका छन्। अहिले पक्राउ गरेका व्यक्तिहरूले प्रतिव्यक्ति १०/१२ जनालाई भारत पुर्याएर मिर्गौला निकालेको बताएका छन्।
यस वर्षमात्र १० जना भन्दा बढीलाई लगेको उनीहरूले प्रहरीलाई बताएका छन्। खिलबहादुरलाई पनि समिर र कुमारले नेपाल लिएर आएका हुन्।
यस गिरोहमा कति जना छ भन्ने यकिन भइसकेको छैन। दुई देशमा बसेर सबै प्रवन्ध मिलाएर मिर्गौला बेच्ने काम गरिरहेका छन्। त्यसैले यसलाई संगठित अपराधमा दर्ता गरेर अनुसन्धान अगाडि बढाइएको छ।
यस घटनामा जोडिएका प्रतिवादीहरूलाई खोज्ने काम भइरहेको छ। भारतमा भएकाहरूलाई पनि सम्बन्धित निकायसँग सहयोग मागिएको छ।
'अनुसन्धान गर्दै जाँदा विगतमा पनि यस्ता घटना दर्ता भएको देखियो,' उनले भने।
२०८१ भदौमा नक्कली नाता प्रमाणित गरेर भारत पुर्याएर मिर्गौला निकालिएको भन्दै प्रहरीमा उजुरी परेको रहेछ। त्यसमा पीडक र पीडित दुवै काभ्रेका रहेको उनले जानकारी दिए।
यही गिरोहका व्यक्ति हुन कि होइन भनेर प्रमाणित हुन भने बाँकी रहेको एसएसपी पंगेनीले बताए।
यो पनिः होटलमा काम गर्न भनेर भारत लगे, ६ लाख दिन्छु भन्दै निकाले मिर्गौला
-1746009348.jpg)
