आफ्नो कार्यालयका हाकिमसँग यौन सम्बन्ध राख्न भन्दै एक बालिकालाई फकाएको आरोपमा कार्यालय–सहयोगी पक्राउ परेकी छन्।
जिल्ला प्रहरी कार्यालय ओखलढुंगाका इन्स्पेक्टर विक्रमबहादुर भट्टराईका अनुसार ओखलढुंगाको एक सरकारी कार्यालयमा कार्यरत प्रमिला विश्वकर्मा पक्राउ परेकी हुन्।
प्रमिलाले आफूले काम गर्ने कार्यालयका प्रमुखसँग यौन सम्बन्ध राख्न भन्दै १३ वर्षीया बालिकालाई फकाएको अडिओ रेकर्ड पनि प्रहरीले पाएको छ।
बालिकाले दिएको जाहेरीका आधारमा उनलाई साउन २१ गते पक्राउ गरिएको हो। उनीविरूद्ध बालबालिका सम्बन्धी ऐनको बालयौन दुराचार कसुरमा ५ दिन म्याद थप गरेर अनुसन्धान भइरहेको इन्स्पेक्टर भट्टराईले बताए।
'सोधपुछ भइरहेको छ, हामीले अनुसन्धान अगाडि बढाएका छौं,' इन्स्पेक्टर भट्टराईले भने।
यो घटनामा कार्यालय प्रमुखबारे भने अझै अनुसन्धान भइरहेको प्रहरीले बताएको छ। उनले प्रमिलालाई ती बालिकालाई फकाउन अह्राएका हुन् वा प्रमिलाले आफै उनको नाम जोडेर भनेकी हुन् भन्नेबारे यकिन भइसकेको छैन।
बालिका कक्षा ८ मा पढ्छिन्। उनका आमाबुबा रोजगारीका निम्ति भारतमा छन्। उनी आफ्नी बहिनीका साथमा आफन्तको घर नजिकै डेरा लिएर बसेका छिन्।
उनी पढ्ने स्कुल र सो कार्यालयको खेलमैदान एकै ठाउँमा पर्छ।
जाहेरी अनुसार प्रमिलाले एक दिन बालिकालाई उनकी बहिनीमार्फत बोलाउन पठाएकी थिइन्।
'तिम्रो दिदीलाई बोलाऊ, कम्प्युटर सिकाइदिन्छु, जागिर लगाइदिन्छु भनेर बहिनीलाई भनेर पठाउनु भएछ,' बालिकाले भनिन्, 'बहिनीलाई किन यस्तो भनेर पठाउनुभएको होला भन्ने लागिरहेको थियो।'
त्यसपछि साउन ११ गते साँझ ५ बजेतिर बालिकाको प्रमिलासँग भेट भयो।
'त्यति बेला ठूलो मान्छेसँग संगत गर, खेलमा पनि लगाइदिनु हुन्छ भन्नुभएको थियो। खास वास्ता गरिनँ,' बालिकाले भनिन्।
१५ गते उनी भलिबल खेलिरहेकी थिइन्। प्रमिला पनि उनीहरूसँगै खेलिन्।
'पछि माथि भर्याङ उक्लिँदै गर्दा तिमीले ठूलोमान्छेसँग संगत गरेको भए हुन्थ्यो, कोही चोखो हुँदैन भनिरहनुभएको थियो,' उनले भनिन्, 'त्यसमा पनि मैले केही जबाफ फर्काइनँ।'
बालिकाका अनुसार प्रमिलाले विभिन्न प्रलोभन देखाइरहिन्।
'तिमी सरसँग जाने कि नजाने भनेर १७ गतेसम्म भन्नू भन्नुभयो,' उनले भनिन्, 'पटक पटक त्यस्तो भनेपछि सरलाई भनिदिने सोचेर मोबाइलमा कुरा रेकर्ड गरेँ।'
प्रमिलाले उनलाई फकाउँदै गरेको भनिएको अडिओमा पनि प्रलोभनमा पार्न खोजेको सुनिन्छ। सो आवाज आफ्नै हो भनेर प्रमिलाले स्वीकार गरिसकेको इन्स्पेक्टर भट्टराईले जानकारी दिए।
रेकर्डमा प्रमिलाले भनेकी छन्, 'सरले तिमीलाई मन पराउनुहुन्छ। तिमीसँग बस्न चाहनुहुन्छ। खर्च पनि दिन्छु भन्नुभएको छ। सर विवाहित केटीसँग सम्बन्ध राख्न चाहनुहुन्न। मेरो मोबाइलमा तिम्रो फोटो देखेर मन पराउनुभएको हो।'
त्यसपछि बालिकाले कस्तो सम्बन्ध भनेर सोधेकी छन्।
प्रमिला भन्छिन्— 'ठूला मान्छेहरूसँग संगत गर्नुपर्छ, भोलि बच्चा बसिहाल्यो भन्यो पनि औषधि हुन्छ। अहिले सम्बन्ध नराख्ने कोही हुँदैन, कोही चोखो हुँदैन। तिमीले सम्बन्ध राखे पनि हामीलाई मात्र थाहा हुन्छ। तिमीलाई मनले खाएको मान्छे भनेर भनिदिएको हो। अरू कुनै ठाउँमा लिएर जाने हो। तिमीलाई सजिलो हुन्छ। फोन बिग्रिएको रहेछ। सरले बनाइदिनु हुन्छ। बनेन भने नयाँ किनिदिनुहुन्छ।'
बालिकाले कहाँ जाने भनेर सोध्दा प्रमिलाले हुलाक डाँडा भन्छिन्। उनले 'सर' को नामसमेत सोधेपछि प्रमिलाले नाम पनि भन्छिन्।
विभिन्न प्रलोभन देखाएर प्रमिलाले फकाउँदै गरेको कुराकानीको २५ मिनेटसम्मको रेकर्डिङ छ।
प्रहरीले घटनाबारे थप अनुसन्धान गरिरहेको र आइतबार नै प्रक्रिया अगाडि बढाउने जनाएको छ।
-1754812957.jpeg)
-1746009348.jpg)
