सफ्टवेयर कम्पनीको कम्प्युटर स्रोत संकेत (सोर्स कोड) चोरेको आरोपमा दुई जना पक्राउ परेका छन्।
साइबर ब्युरोको टोलीले बिहीबार दुई जनालाई पक्राउ गरेको प्रवक्ता तथा एसपी दिपकराज अवस्थीले जानकारी दिए।
पक्राउ पर्नेमा काठमाडौंको बालाजु बस्ने २६ वर्षीय सुजनकुमार महतो र ललितपुरको धोबिघाट बस्ने २४ वर्षीय सुमन श्रेष्ठ छन्।
एसपी अवस्थीका अनुसार सोर्स कोड भनेको सूचना प्रणालीको एक खालको कोड हो।
‘जुनसुकै सूचना प्रणाली बनाउँदा एउटा प्रोग्रामिङ ल्याङ्वेज (कम्प्युटरको भाषा) बनाउनुपर्ने हुन्छ। फेसबुक, टिकटक, बैंकिङ एप लगायत हरेक प्रणालीको पर्दा पछाडि कोडहरू लेखिएका हुन्छन्। ती कोडलाई नै सोर्स कोड भनिन्छ,’ उनले भने।
अहिले पक्राउ परेका महतो र श्रेष्ठमाथि पनि त्यही कोडको चोरी गरेको आरोप लागेको हो।
विदेशी सेवाग्राहीहरूका लागि राइड सेयरिङ एप बनाउने एक कम्पनीमा उनीहरू काम गर्थे।
त्यहाँबाट जागिर छाडिसकेपछि भने पहिलेकै कम्पनीको कोडलाई दुरूपयोग गरेको एसपी अवस्थीले बताए।
‘राइड सेयरिङ एपहरू बनाउने कम्पनी हो। जसले विदेशी सेवाग्राहीहरूसँग काम गर्थ्यो। त्यस कम्पनीमा काम गर्ने पूर्वकर्मचारीले चोरी गरेको देखिएको हो,’ उनले भने, ‘विदेशी कम्पनीलाई बेचेको समेत देखिएको छ।’
यसमा दुई जना मात्रै नभई अरूको समेत संलग्नता देखिएको उनले बताए।
अहिले दुई जना पक्राउ परेपनि अरू व्यक्तिहरूको खोजी गरिरहेको उनले बताए।
उनीहरू दुई जनालाई पक्राउ गरेपछि प्रहरीले जिल्ला अदालत काठमाडौंमा उपस्थित गराएको छ।
विद्युतीय (इलेक्ट्रोनिक) कारोबार ऐन, २०६३ अनुसार प्रहरीले अदालतबाट पाँच दिन हिरासतमा राख्न अनुमति लिएको छ।
-1746009348.jpg)
